കോട്ടയം: മുന്‍ വൈരാഗ്യത്തെത്തുടര്‍ന്ന് പരസ്പരം ഏറ്റുമുട്ടുകയും പിന്നീട് വീട്ടില്‍ക്കയറി ആക്രമണം നടത്തുകയും ചെയ്ത കേസിൽ സഹോദരങ്ങള്‍ അടക്കം ആറുപേര്‍ പൊലീസ് പിടിയിൽ. കൈപ്പുഴ കുര്യാറ്റുകുന്നേല്‍ കോളനിയില്‍ കുര്യാറ്റുകുന്നേല്‍ അമല്‍ വര്‍ഗീസ് (22), സഹോദരന്‍ അലന്‍ വര്‍ഗീസ് (18) അതിരമ്പുഴ ശ്രീകണ്ഠമംഗലം മങ്കോട്ടിപ്പറമ്പില്‍ വൈശാഖ് (24), കൈപ്പുഴ പുളിങ്കാല ഭാഗത്ത് വഞ്ചിയില്‍ ഷിജു ജോയി, കൈപ്പുഴ പൂഴിക്കനട ഭാഗത്ത് കുന്നുംപുറത്ത് രഞ്ജിത്ത് ബാബു (25), കൈപ്പുഴ ചൊള്ളക്കരയില്‍ ജിതിന്‍ (24) എന്നിവരെയാണ് ഗാന്ധിനഗര്‍ പൊലീസ് അറസ്റ്റ് ചെയ്തത്. സുഹൃത്തുക്കളായ ഇവര്‍ തമ്മില്‍ വാഹനം റെന്‍റിന് എടുക്കുന്നതുമായി ബന്ധപ്പെട്ടുണ്ടായ തര്‍ക്കമാണ് ആക്രമണത്തില്‍ കലാശിച്ചത്.
കഴിഞ്ഞദിവസം രാത്രി കൈപ്പുഴ ശാസ്താംങ്കല്‍ ഗുരുമന്ദിരം ഭാഗത്തുവച്ച് ഓട്ടോയില്‍ വന്ന വൈശാഖിനെയും ഷിജുവിനെയും അമലും അലനും കാണുകയും ഇവര്‍ തമ്മില്‍ വാക്കുതര്‍ക്കമുണ്ടാവുകയും ചെയ്തു. തുടര്‍ന്ന്, അമലും അലനും ചേര്‍ന്നു കമ്പിവടി ഉപയോഗിച്ച് ഇവരെ ആക്രമിച്ചു.
Read Also : യുവാവിനെ തട്ടിക്കൊണ്ടുപോയി മര്ദ്ദിച്ച കേസ് : രണ്ടുപേർ കൂടി അറസ്റ്റിൽ
അന്നു രാത്രി 10-നു വൈശാഖും ഷിജുവും മറ്റു സുഹൃത്തുക്കളായ രഞ്ജിത്ത് ബാബു, ജിതിന്‍ എന്നിവരോടൊപ്പം കുര്യാറ്റുകുന്നേല്‍ കോളനിയിലുള്ള അമലിന്‍റെ വീട്ടില്‍ അതിക്രമിച്ചു കയറി കമ്പിവടികൊണ്ട് അമലിനെ അടിച്ചു പരിക്കേല്‍പ്പിക്കുകയും വീട്ടിലുണ്ടായിരുന്ന അമലിന്‍റെ അമ്മയെ തള്ളിയിടുകയും ചെയ്തു. തുടര്‍ന്ന്, പൊലീസ് എല്ലാവരെയും അറസ്റ്റ് ചെയ്യുകയായിരുന്നു. അമലിനു ഗാന്ധിനഗര്‍ സ്റ്റേഷനില്‍ മറ്റൊരു കേസും വൈശാഖിന് ഏറ്റുമാനൂര്‍ സ്റ്റേഷനിലും കേസുകളുണ്ട്.
ഗാന്ധിനഗര്‍ എസ്എച്ച്ഒ കെ. ഷിജി, എസ്‌ഐമാരായ വി. വിദ്യ, പ്രദീപ് ലാല്‍, സിപിഒ സോണി എന്നിവരാണ് അന്വേഷണ സംഘത്തിലുണ്ടായിരുന്നത്. പ്രതികളെ കോടതിയില്‍ ഹാജരാക്കി.
Post Your Comments