ചവറ: ഗ്രാമപഞ്ചായത്ത് കൊറ്റംകുളങ്ങര ഡിവിഷനിലെ ഉപതെരഞ്ഞെടുപ്പ് ദിവസം നടന്ന സംഘര്‍ഷത്തില്‍ എസ്ഐക്കും പൊലീസ് ഉദ്യോഗസ്ഥര്‍ക്കും നേരെ ആക്രമണം നടത്തിയ സംഘത്തിലെ ഒരാൾ അറസ്റ്റിൽ. ചവറ പട്ടത്താനം കൊച്ചുവീട്ടില്‍ മനോജ്(34) ആണ് പോലീസ് പിടിയില്‍ ആയത്. ചവറ പൊലീസ് ആണ് അറസ്റ്റ് ചെയ്തത്.
ചവറ ഗ്രാമപഞ്ചായത്ത് കൊറ്റംകുളങ്ങര ഡിവിഷനിലെ ഉപതെരഞ്ഞെടുപ്പ് ദിനത്തിൽ വൈകുന്നേരം പോളിങ്ങ് അവസാനിച്ചതിനു ശേഷം കൊറ്റംകുളങ്ങര കുഞ്ഞാലുംമൂട് ജംഗ്ഷനില്‍ രാഷ്ട്രീയ അഭിപ്രായ വ്യത്യാസങ്ങളെ തുടര്‍ന്ന്, ഇരു വിഭാഗങ്ങളിലെയും രാഷ്ട്രീയ പ്രവര്‍ത്തകര്‍ തമ്മില്‍ വാക്കേറ്റവും സംഘര്‍ഷവും ഉണ്ടായിരുന്നു.
സംഭവമറിഞ്ഞ് സ്ഥലത്ത് എത്തിയ ചവറ പൊലീസ് സ്റ്റേഷനിലെ എസ്ഐ നൗഫലും സംഘവും സംഘര്‍ഷാവസ്ഥ തടയാന്‍ ശ്രമിച്ചെങ്കിലും ഇരു കൂട്ടരും പിന്‍മാറാന്‍ തയാറായില്ല. ഇതിനിടയില്‍ അക്രമം തടയാന്‍ ശ്രമിച്ച പൊലീസ് ഉദ്യോഗസ്ഥരെ സംഘത്തിൽ പെട്ടവർ ആക്രമിക്കുകയായിരുന്നുവെന്ന് പൊലീസ് പറഞ്ഞു.
ചവറ പൊലീസ് സ്റ്റേഷന്‍ ഇന്‍സ്പെക്ടര്‍ വിപിന്‍കുമാര്‍ യു. പി യുടെ നേതൃത്വത്തിലുള്ള പൊലീസ് സംഘമാണ് ഇയാളെ അറസ്റ്റ് ചെയ്തത്. പ്രതിയെ കോടതിയിൽ ഹാജരാക്കി.
Post Your Comments