കൊച്ചി: പി.സി. ജോര്‍ജിന് പിന്തുണ നല്‍കി ബി.ജെ.പി കോട്ടയം മുന്‍ ജില്ലാ പ്രസിഡന്റ് നോബിള്‍ മാത്യു. നാര്‍കോട്ടിക് ജിഹാദിനും, ലവ് ജിഹാദിനും പുറമേ കേരളത്തില്‍ പീഡിയാട്രിക് ജിഹാദുമുണ്ടെന്നാണ് നോബിള്‍ മാത്യുവിന്റെ വാദം. പോപ്പുലര്‍ ഫ്രണ്ടിന്റെ റാലിയില്‍ വിദ്വേഷ മുദ്രാവാക്യം വിളിച്ച കുട്ടിയ്‌ക്കെതിരെ എന്തുകൊണ്ട് കേസെടുക്കുന്നില്ലായെന്നും കല്ലറങ്ങാട്ട് പിതാവ് പറഞ്ഞതുപോലെ കേരളത്തില്‍ നാര്‍കോട്ടിക് ജിഹാദും, ലവ് ജിഹാദും, ഇപ്പോള്‍ പീഡിയാട്രിക് ജിഹാദുമുണ്ടെന്ന് തെളിഞ്ഞിരിക്കുന്നുവെന്നും അദ്ദേഹം പറഞ്ഞു.
‘അരിയും മലരും കുന്തിരിക്കവും വാങ്ങി വെച്ചോളൂ നിന്റെയൊക്കെ കാലന്മാര്‍ വരുന്നുണ്ടെന്ന’ പോപ്പുലര്‍ ഫ്രണ്ടിന്റെ ബഹുജന റാലിയില്‍ കുട്ടി വിളിച്ച മുദ്രാവാക്യങ്ങള്‍ക്കെതിരെയായിരുന്നു നോബിള്‍ മാത്യുവിന്റെ പീഡിയാട്രിക് ജിഹാദ് പരാമര്‍ശം.
പാലാ രൂപത ബിഷപ്പ് ജോസഫ് കല്ലറങ്ങാട്ട് നടത്തിയ ‘നാര്‍കോട്ടിക് ജിഹാദ് ‘ എന്ന പരാമര്‍ശം വലിയ വിവാദങ്ങള്‍ക്കും ചര്‍ച്ചകള്‍ക്കും വഴിവെച്ചിരുന്നു. മുസ്‌ലിങ്ങള്‍ അല്ലാത്തവര്‍ ഇല്ലാതാകണമെന്നാണ് ജിഹാദി ഗ്രൂപ്പുകളുടെ ലക്ഷ്യമെന്നും കത്തോലിക്ക യുവാക്കളില്‍ മയക്ക്മരുന്ന് ഉപയോഗം വ്യാപകമാക്കാന്‍ പ്രത്യേക ശ്രമങ്ങള്‍ നടക്കുന്നുണ്ടെന്നുമായിരുന്നു ജോസഫ് കല്ലറങ്ങാട്ടിന്റെ പരാമര്‍ശം.
Post Your Comments