ജാമ്യം ലഭിച്ച് പുറത്തിറങ്ങിയതിനു പിന്നാലെ ​​ഗുജറാത്തിൽ ബന്ദിന് ആഹ്വാനം ചെയ്ത് ജി​ഗ്നേഷ് മേവാനി

ന്യൂഡൽ‌ഹി: ​​ഗുജറാത്തിൽ ബന്ദിന് ആഹ്വാനം ചെയ്ത് എംഎൽഎ ജി​ഗ്നേഷ് മേവാനി. ജാമ്യം ലഭിച്ച് പുറത്തിറങ്ങിയതിനു പിന്നാലെയാണ് ജി​ഗ്നേഷ് മേവാനിയുടെ ആഹ്വാനം. തന്റെ അറസ്റ്റിന്റെ പേരിലല്ല ബന്ദ് നടത്തുന്നതെന്നും ​ഗുജറാത്ത് സർക്കാരിന്റെ വീഴ്ചകൾക്കെതിരെയാണെന്നും ജി​ഗ്നേഷ് മേവാനി വ്യക്തമാക്കി. മുന്ദ്ര തുറമുഖത്ത് ലക്ഷങ്ങൾ വില മതിക്കുന്ന മയക്കു മരുന്ന് പിടികൂടിയ സംഭവത്തിലെ അന്വേഷണം, ​ഗോഹത്യയുടെ പേരിൽ 2016 ൽ ദളിതർക്കെതിരെ എടുത്ത കേസ് പിൻവലിക്കണം തുടങ്ങിയ ആവശ്യങ്ങൾ ഉന്നയിച്ചാണ് ജി​ഗ്നേഷിന്റെ ബന്ദ് ആഹ്വാനം. ആവശ്യങ്ങൾ അം​ഗീകരിച്ചില്ലെങ്കിൽ ​ജൂൺ ഒന്നിന് ​ഗുജറാത്തിൽ ബന്ദ് നടത്തുമെന്നാണ് മുന്നറിയിപ്പ്.

Read Also: രാജ്യത്ത് നിർബന്ധിത വാക്സിനേഷൻ പാടില്ല: ഉത്തരവുകൾ പിൻവലിക്കണമെന്ന് സുപ്രീംകോടതി

‘മുന്ദ്ര തുറമുഖത്ത് നിന്ന് മയക്കുമരുന്ന് കടത്താൻ ശ്രമിച്ച സംഭവത്തിന് പിന്നിൽ പ്രധാനമന്ത്രിയും ​ഗൗതം അദാനിയും തമ്മിലുള്ള കൂട്ടുകെട്ടാണ്. ഞാൻ ഇത് ട്വീറ്റ് ചെയ്യാൻ പോവുന്നു. വരുന്ന 24 മണിക്കൂറും ഞാൻ ഡൽഹിയിലുണ്ടാവും. അവർക്ക് വേണമെങ്കിൽ എന്നെ അറസ്റ്റ് ചെയ്യാം. എന്തുകൊണ്ടാണ് ​ഗൗതം അദാനിയെ ആരും ചോദ്യം ചെയ്യാത്തത്. പ്രധാനമന്ത്രിയുമായി അടുപ്പമുള്ളത് കൊണ്ടാണോ. തന്നെ അറസ്റ്റ് ചെയ്തപ്പോൾ നിയമസഭാ സ്പീക്കറെ പോലും അറിയിച്ചിരുന്നില്ല. എല്ലാ നിയമങ്ങളും ലംഘിക്കപ്പെട്ടു. തന്റെ അറസ്റ്റ് ​ഗുജറാത്തിന് മേലുള്ള കടന്നാക്രമണമായിരുന്നു ‘- ജി​ഗ്നേഷ് മേവാനി പ്രതികരിച്ചു.