ശരഭേശാഷ്ടകം
ശ്രീശിവ ഉവാച –
ശൃണു ദേവി മഹാഗുഹ്യം പരം പുണ്യവിവര്‍ധനം
ശരഭേശാഷ്ടകം മന്ത്രം വക്ഷ്യാമി തവ തത്ത്വതഃ
ഋഷിന്യാസാദികം യത്തത്സര്‍വപൂര്‍വവദാചരേത്
ധ്യാനഭേദം വിശേഷേണ വക്ഷ്യാംയഹമതഃ ശിവേ
ധ്യാനം –
ജ്വലനകുടിലകേശം സൂര്യചന്ദ്രാഗ്നിനേത്രം
നിശിതതരനഖാഗ്രോദ്ധൂതഹേമാഭദേഹം
ശരഭമഥ മുനീന്ദ്രൈഃ സേവ്യമാനം സിതാങ്ഗം
പ്രണതഭയവിനാശം ഭാവയേത്പക്ഷിരാജം
അഥ സ്തോത്രം –
ദേവാദിദേവായ ജഗന്‍മയായ ശിവായ നാലീകനിഭാനനായ
ശര്‍വായ ഭീമായ ശരാധിപായ നമോഽസ്തു തുഭ്യം ശരഭേശ്വരായ
ഹരായ ഭീമായ ഹരിപ്രിയായ ഭവായ ശാന്തായ പരാത്പരായ
മൃഡായ രുദ്രായ വിലോചനായ നമോഽസ്തു തുഭ്യം ശരഭേശ്വരായ
ശീതാംശുചൂഡായ ദിഗംബരായ സൃഷ്ടിസ്ഥിതിധ്വംസനകാരണായ
ജടാകലാപായ ജിതേന്ദ്രിയായ നമോഽസ്തു തുഭ്യം ശരഭേശ്വരായ
കലങ്കകണ്ഠായ ഭവാന്തകായ കപാലശൂലാത്തകരാംബുജായ
ഭുജങ്ഗഭൂഷായ പുരാന്തകായ നമോഽസ്തു തുഭ്യം ശരഭേശ്വരായ
ശമാദിഷട്കായ യമാന്തകായ യമാദിയോഗാഷ്ടകസിദ്ധിദായ
ഉമാധിനാഥായ പുരാതനായ നമോഽസ്തു തുഭ്യം ശരഭേശ്വരായ
ഘൃണാദിപാശാഷ്ടകവര്‍ജിതായ ഖിലീകൃതാസ്മത്പഥി പൂര്‍വഗായ ।
ഗുണാദിഹീനായ ഗുണത്രയായ നമോഽസ്തു തുഭ്യം ശരഭേശ്വരായ
കാലായ വേദാമൃതകന്ദലായ കല്യാണകൌതൂഹലകാരണായ
സ്ഥൂലായ സൂക്ഷ്മായ സ്വരൂപഗായ നമോഽസ്തു തുസ്തു തുഭ്യം ശരഭേശ്വരായ
പഞ്ചാനനായാനിലഭാസ്കരായ പഞ്ചാശദര്‍ണാദ്യപരാക്ഷയായ
പഞ്ചാക്ഷരേശായ ജഗദ്ധിതായ നമോഽസ്തു തുഭ്യം ശരഭേശ്വരായ
നീലകണ്ഠായ രുദ്രായ ശിവായ ശശിമൌലിനേ
ഭവായ ഭവനാശായ പക്ഷിരാജായ തേ നമഃ
പരാത്പരായ ഘോരായ ശംഭവേ പരമാത്മനേ
ശര്‍വായ നിര്‍മലാങ്ഗായ സാലുവായ നമോ നമഃ
ഗങ്ഗാധരായ സാംബായ പരമാനന്ദതേജസേ
സര്‍വേശ്വരായ ശാന്തായ ശരഭായ നമോ നമഃ
വരദായ വരാങ്ഗായ വാമദേവായ ശൂലിനേ
ഗിരിശായ ഗിരീശായ ഗിരിജാപതയേ നമഃ
കനകജഠരകോദ്യദ്രക്തപാനോന്‍മദേന
പ്രഥിതനിഖിലപീഡാനാരസിംഹേന ജാതാ
ശരഭ ഹര ശിവേശ ത്രാഹി നഃ സര്‍വപാപാ-
ദനിശമിഹ കൃപാബ്ധേ സാലുവേശ പ്രഭോ ത്വം
സര്‍വേശ സര്‍വാധികശാന്തമൂര്‍തേ കൃതാപരാധാനമരാനഥാന്യാന്‍
വിനീയ വിശ്വവിധായി നീതേ നമോഽസ്തു തുഭ്യം ശരഭേശ്വരായ
ദംഷ്ട്രാനഖോഗ്രഃ ശരഭഃ സപക്ഷശ്ചതുര്‍ഭുജശ്ചാഷ്ടപദഃ സഹേതിഃ
കോടീരഗങ്ഗേന്ദുധരോ നൃസിംഹക്ഷോഭാപഹോഽസ്മദ്രിപുഹാസ്തു ശംഭുഃ
ഹുങ്കാരീ ശരഭേശ്വരോഽഷ്ടചരണഃ പക്ഷീ ചതുര്‍ബാഹുകഃ
പാദാകൃഷ്ടനൃസിംഹവിഗ്രഹധരഃ കാലാഗ്നികോടിദ്യുതിഃ
വിശ്വക്ഷോഭഹരഃ സഹേതിരനിശം ബ്രഹ്മേന്ദ്രമുഖ്യൈഃ സ്തുതോ
ഗങ്ഗാചന്ദ്രധരഃ പുരത്രയഹരഃ സദ്യോ രിപുഘ്നോഽസ്തു നഃ
മൃഗാങ്കലാങ്ഗൂലസചഞ്ചുപക്ഷോ ദംഷ്ട്രാനനാങ്ഘ്രിശ്ച ഭുജാസഹസ്രഃ
ത്രിനേത്രഗങ്ഗേന്ദുധരഃ പ്രഭാഢ്യഃ പായാദപായാച്ഛരഭേശ്വരോ നഃ
നൃസിംഹമത്യുഗ്രമതീവതേജഃപ്രകാശിതം ദാനവഭങ്ഗദക്ഷം
പ്രശാന്തിമന്തം വിദധാതി യോ മാം സോഽസ്മാനപായാച്ഛരഭേശ്വരോഽവതു നഃ
യോഽഭൂത് സഹസ്രാംശുശതപ്രകാശഃ സ പക്ഷിസിംഹാകൃതിരഷ്ടപാദഃ
നൃസിംഹസങ്ക്ഷോഭശമാത്തരൂപഃ പായാദപായാച്ഛരഭേശ്വരോ നഃ
ത്വാം മന്യുമന്തം പ്രവദന്തി വേദാസ്ത്വാം ശാന്തിമന്തം മുനയോ ഗൃണന്തി
ദൃഷ്ടേ നൃസിംഹേ ജഗദീശ്വരേ തേ സര്‍വാപരാധം ശരഭ ക്ഷമസ്വ
കരചരണകൃതം വാക്കര്‍മജം കായജം വാ
ശ്രവണനയനജം വാ മാനസം വാപരാധം ।
വിഹിതമവിഹിതം വാ സര്‍വമേതത്ക്ഷമസ്വ
ശിവ ശിവ കരുണാബ്ധേ ശ്രീമഹാദേവ ശംഭോ
രുദ്രഃ ശങ്കര ഈശ്വരഃ പശുപതിഃ സ്ഥാണുഃ കപര്‍ദീ ശിവോ
വാഗീശോ വൃഷഭധ്വജഃ സ്മരഹരോ ഭക്തപ്രിയസ്ത്ര്യംബകഃ
ഭൂതേശോ ജഗദീശ്വരശ്ച വൃഷഭോ മൃത്യുഞ്ജയഃ ശ്രീപതിഃ
യോഽസ്മാന്‍ കാലഗലോഽവതാത്പുരഹരഃ ശംഭുഃ പിനാകീ ഹരഃ
യതോ നൃസിംഹം ഹരസി ഹര ഇത്യുച്യതേ ബുധൈഃ
യതോ ബിഭര്‍ഷി സകലം വിഭജ്യ തനുമഷ്ടധാ
അതോഽസ്മാന്‍ പാഹി ഭഗവന്‍പ്രസീദ ച പുനഃ പുനഃ
ഇതി സ്തുതോ മഹാദേവഃ പ്രസന്നോ ഭക്തവത്സലഃ
സുരാനാഹ്ലാദയാമാസ വരദാനൈരഭീപ്സിതൈഃ
പ്രസന്നോഽസ്മി സ്തവേനാഹമനേന വിബുധേശ്വരാഃ
മയി രുദ്രേ മഹാദേവേ ഭയത്വം ഭക്തിമൂര്‍ജിതം
മമാംശോഽയം നൃസിംഹോഽയം മയി ഭക്തതമസ്ത്വിഹ
ഇമം സ്തവം ജപേദ്യസ്തു ശരഭേശാഷ്ടകം നരഃ
തസ്യ നശ്യന്തി പാപാനി രിപവശ്ച സുരോത്തമാഃ
നശ്യന്തി സര്‍വരോഗാണി ക്ഷയരോഗാദികാനി ച
അശേഷഗ്രഹഭൂതാനി കൃത്രിമാണി ജ്വരാണി ച
സര്‍പചോരാഗ്നിശാര്‍ദൂലഗജപോത്രിമുഖാനി ച
അന്യാനി ച വനസ്ഥാനി നാസ്തി ഭീതിര്‍ന സംശയഃ
ഇത്യുക്ത്വാന്തര്‍ദധേ ദേവി ദേവാന്‍ ശരഭസാലുവഃ
തതസ്തേ സ്വ-സ്വധാമാനി യയുരാഹ്ലാദപൂര്‍വകം
ഏതച്ഛരഭകം സ്തോത്രം മന്ത്രഭൂതം ജപേന്നരഃ
സര്‍വാന്‍കാമാനവാപ്നോതി ശിവലോകം ച ഗച്ഛതി
ഇതി ശ്രീആകാശഭൈരവകല്‍പോക്തം പ്രത്യക്ഷസിദ്ധിപ്രദേ
ഉമാമഹേശ്വരസംവാദേ ശരഭേശാഷ്ടകസ്തോത്രമന്ത്രം സമ്പൂര്‍ണം
Post Your Comments