വലയില്‍ കുടുങ്ങിയ മൂര്‍ഖനെ പിടിക്കുന്നതിനിടെ മൂർഖന്റെ കടിയേറ്റ് പാമ്പുപിടിത്തക്കാരൻ ഗുരുതരാവസ്ഥയിൽ

കൊല്ലം: വലയിൽ കുടുങ്ങിയ മൂർഖനെ രക്ഷിക്കുന്നതിനിടെ കടിയേറ്റ പാമ്പുപിടിത്തക്കാരൻ ഗുരുതരാവസ്ഥയിൽ. തട്ടാമല ചകിരിക്കട പിണയ്ക്കൽ സന്തോഷിനാണ് കടിയേറ്റത്.

മൈലാപ്പൂര് കല്ലുവിള അശോകന്റെ വീട്ടിൽ ബുധനാഴ്ച പുലർച്ചെയാണ് വലയിൽ കുടുങ്ങിയനിലയിൽ പാമ്പിനെ കണ്ടത്. വീടിന്റെ അടുക്കളഭാഗത്ത് മീൻ വളർത്താനുള്ള ടാങ്കായി ഉപയോഗിച്ചിരുന്ന പഴയ ഫ്രിഡ്ജ്‌ മൂടിയിരുന്ന വലയിലാണ് പാമ്പ് കുടുങ്ങിയത്.

അതിരാവിലെ ശബ്ദംകേട്ട് പുറത്തിറങ്ങിയ വീട്ടുകാരാണ് പാമ്പിനെ കണ്ടത്. ഇവർ അറിയിച്ചതിനെത്തുടർന്നാണ് സന്തോഷ് സ്ഥലത്തെത്തിയത്. നാട്ടുകാരുടെ സഹായത്തോടെ പാമ്പിനെ പിടികൂടി വല മുറിച്ചുമാറ്റി. പാമ്പിന്റെ തലയോടടുത്ത ഭാഗത്തെ വല മാറ്റുന്നതിനിടെയാണ് കടിയേറ്റത്. പിടിവിടാതെ സന്തോഷ് പാമ്പിനെ കുപ്പിയിലടച്ചു.

സന്തോഷിനെ പിന്നീട് കൊട്ടിയത്തെ സ്വകാര്യ ആശുപത്രിയിലെ തീവ്രപരിചരണ വിഭാഗത്തിൽ പ്രവേശിപ്പിച്ചു. അശോകന്റെ വീടിനോടുചേർന്ന് കാടുമൂടിക്കിടന്ന ഭാഗം അടുത്തിടെ വൃത്തിയാക്കി പ്ലോട്ടുകളാക്കി തിരിച്ചിരുന്നു. ഇവിടെനിന്നാകാം പാമ്പ് എത്തിയതെന്ന് നാട്ടുകാർ പറയുന്നു