നോമ്പ് കാലത്ത് മാതൃകയായി ഗുജറാത്തിലെ ക്ഷേത്രം: മുസ്ലിം സഹോദരങ്ങൾക്ക് റംസാന്‍ നോമ്പ് തുറയ്ക്ക് സൗകര്യമൊരുക്കി

അഹമ്മദാബാദ്: മതസൗഹാർദത്തിന്റെ നിരവധി വാർത്തകൾ ആണ് ഈ നോമ്പ് കാലത്ത് പുറത്തുവരുന്നത്. ഗുജറാത്തിൽ മുസ്ലിംങ്ങളുടെ നോമ്പ് തുറയ്ക്ക് സൗകര്യമൊരുക്കിയത് ഒരു ക്ഷേത്രമാണ്. ഗുജറാത്തിലെ വരന്ദവീര്‍ മഹാരാജ് ക്ഷേത്രമാണ് മതസൗഹാർദത്തിന് ഉത്തമ മാതൃകയായിരിക്കുന്നത്.

വദ്ഗാം താലൂക്കിലെ ഗ്രാമത്തിലെ നൂറോളം മുസ്ലിം നിവാസികളെ ക്ഷേത്ര പരിസരത്ത് മഗ്‌രീബ് നമസ്‌കരിക്കാനും നോമ്പ് തുറക്കാനും ക്ഷണിച്ചത് ക്ഷേത്ര കമ്മിറ്റിയാണ്. 1200 വര്‍ഷം പഴക്കമുള്ള വരന്ദവീര്‍ മഹാരാജ് ക്ഷേത്ര കമ്മിറ്റിയുടെ ക്ഷണം സ്വീകരിച്ചെത്തിയവരെ സന്തോഷത്തോടെയാണ് ഏവരും സ്വാഗതം ചെയ്തത്. ക്ഷേത്ര കമ്മിറ്റി മുന്നോട്ടുവെച്ച നോമ്പ് തുറയെ പ്രശംസിച്ച് നിരവധി ആളുകളാണ് രംഗത്തെത്തിയത്.

Also Read:വീടുവിട്ടിറങ്ങിയ പതിനാറുകാരിയെ പീഡിപ്പിക്കാൻ ശ്രമിച്ച 52 കാരൻ അറസ്റ്റിൽ

‘വരന്ദവീര്‍ മഹാരാജ് ക്ഷേത്രം ഞങ്ങളുടെ ഗ്രാമത്തിലെ ഒരു ചരിത്ര സ്ഥലമാണ്. വര്‍ഷം മുഴുവനും നിരവധി സഞ്ചാരികള്‍ ഇവിടെ സന്ദര്‍ശിക്കുന്നു. സഹവര്‍ത്തിത്വത്തിലും സാഹോദര്യത്തിലും ഞങ്ങള്‍ എന്നും വിശ്വസിച്ചിരുന്നു. പലപ്പോഴും, ഹിന്ദു, മുസ്ലിം ആഘോഷങ്ങളില്‍ ഗ്രാമവാസികള്‍ സഹായിക്കുമെന്ന് ഞങ്ങള്‍ ഉറപ്പാക്കുന്നു. ഈ വര്‍ഷം ക്ഷേത്ര ട്രസ്റ്റും ഗ്രാമപഞ്ചായത്തും ചേര്‍ന്ന് മുസ്ലിം സഹോദരങ്ങളെ നമ്മുടെ ക്ഷേത്രപരിസരത്തേക്ക് നോമ്പുതുറക്കാന്‍ ക്ഷണിക്കാന്‍ തീരുമാനിച്ചു’, ക്ഷേത്രത്തിലെ പൂജാരി പറഞ്ഞു.

‘ഞങ്ങളുടെ ഗ്രാമത്തിലെ 100-ലധികം മുസ്ലിം സഹോദരന്മാർക്ക് ഞങ്ങൾ ആറ് തരം പഴങ്ങളും ഈത്തപ്പഴവും സർബത്തും ക്രമീകരിച്ചു. ഇന്ന് ഞങ്ങളുടെ പ്രാദേശിക പള്ളിയിലെ മൗലാനാ സാഹിബിനെ നേരിട്ട് ചെന്ന് ഞങ്ങൾ ക്ഷണിച്ചു’, ക്ഷേത്ര പൂജാരി കൂട്ടിച്ചേർത്തു.

Also Read:വീടുവിട്ടിറങ്ങിയ പതിനാറുകാരിയെ പീഡിപ്പിക്കാൻ ശ്രമിച്ച 52 കാരൻ അറസ്റ്റിൽ

‘ഞങ്ങളുടെ ഗ്രാമം സാഹോദര്യത്തിന് പേരുകേട്ടതാണ്. ഞങ്ങളുടെ ഹിന്ദു സഹോദരങ്ങളുടെ ഉത്സവങ്ങളിൽ ഞങ്ങൾ തോളോട് തോൾ ചേർന്ന് പ്രവർത്തിച്ചിട്ടുണ്ട്. ഇത്തവണ, ഗ്രാമപഞ്ചായത്ത് ഹിന്ദു, മുസ്ലീം സമുദായ നേതാക്കളെ സമീപിക്കുകയും ഈ വെള്ളിയാഴ്ച ക്ഷേത്രത്തിൽ വ്രതം അനുഷ്ഠിക്കണമെന്ന് നിർദ്ദേശം നൽകുകയും ചെയ്തു. ഞങ്ങൾക്ക് അത് ഒരു വൈകാരിക നിമിഷമായിരുന്നു’, ദൽവാനയിൽ നിന്നുള്ള 35 കാരനായ വ്യവസായി വസീം ഖാൻ പറഞ്ഞു.

2011 ലെ സെൻസസ് റിപ്പോർട്ടുകൾ പ്രകാരം ദൽവാനയിൽ 2,500 പേരാണുള്ളത്. പ്രധാനമായും രാജ്പുത്, പട്ടേൽ, പ്രജാപതി, ദേവിപൂജക്, മുസ്ലീം ഗോത്രങ്ങളിൽ നിന്നുള്ളവരാണ് ഇവർ. കൃഷിയിലും കച്ചവടത്തിലും ഏർപ്പെട്ടിരിക്കുന്ന 50 ഓളം കുടുംബങ്ങളിൽ മുസ്ലിംങ്ങളും ഉൾപ്പെടുന്നു. വർഷം മുഴുവനും എണ്ണമറ്റ വിനോദസഞ്ചാരികളെ ആകർഷിക്കുന്ന പ്രദേശത്തെ ചരിത്രപരമായ ആകർഷണമാണ് വരന്ദ വീർ മഹാരാജ് ക്ഷേത്രം.