രുചിയൂറുന്ന ചിക്കന്‍ പുലാവ് ഇനി വീട്ടിൽ തന്നെ തയ്യാറാക്കാം

കുട്ടികള്‍ക്ക് ഏറെ ഇഷ്ടപ്പെടുന്ന വിഭവങ്ങളിലൊന്നാണ് ചിക്കന്‍ പുലാവ്. സ്വാദുള്ള ചിക്കന്‍ പുലാവ് വീട്ടിലുണ്ടാക്കാന്‍ വളരെ കുറഞ്ഞ സമയം മതി. രുചിയൂറുന്ന ചിക്കന്‍ പുലാവ് തയാറാക്കുന്നത് എങ്ങനെയെന്ന് നോക്കാം.

ചേരുവകള്‍

ബോണ്‍ലെസ്സ് ചിക്കന്‍ -900 ഗ്രാം

ബസുമതി റൈസ് -3 കപ്പ്

ഉള്ളി -1 എണ്ണം

പച്ചമുളക് -3 എണ്ണം

വെളുത്തുളളി -10 എണ്ണം

ഇഞ്ചി – വലുത്

ഉരുളക്കിഴങ്ങ് -1( ചെറിയ കഷ്ണങ്ങള്‍ ആക്കിയത് )

മഞ്ഞള്‍ പൊടി -3/4 ടീസ്പൂണ്‍

മുളക് പൊടി -1/2 ടീസ്പൂണ്‍ ( സാധാരണ മുളക് പൊടി+കാശ്മീരി മുളക് പൊടി )

മല്ലി പൊടി – 2 ടീസ്പൂണ്‍

ജീരക പൊടി – 1ടീസ്പൂണ്‍

ഓയില്‍ – 3 ടീസ്പൂണ്‍

ബെലീഫ് -1

ഗ്രാമ്പൂ – 4 എണ്ണം

ഏലക്ക – 3 എണ്ണം

കറുവ പട്ട -1 എണ്ണം

മല്ലി ഇല – ആവശ്യത്തിന്

Read Also : കോള്‍ട്ടര്‍ നൈലിന്റെ പകരക്കാരനെ കണ്ടെത്താൻ രാജസ്ഥാന്‍ റോയല്‍സ്: ലിസ്റ്റിൽ സൂപ്പർ താരങ്ങൾ

തയ്യാറാക്കുന്ന വിധം

ബസ്മതി റൈസ് 20 മിനിറ്റ് കുതിര്‍ത്തു വെക്കുക. ശേഷം ഇഞ്ചി വെളുത്തുളളി നല്ലതു പോലെ അരച്ച് പേസ്റ്റ് രൂപത്തിലാക്കിയെടുക്കുക. കഴുകി വൃത്തിയാക്കിയ ചിക്കന്‍ ചെറിയ കഷ്ണങ്ങളാക്കിയതിന് ശേഷം 1 ടീസ്പൂണ്‍ ഇഞ്ചി വെളുത്തുളളി പേസ്റ്റ് , 1/4 ടീസ്പൂണ്‍ മഞ്ഞള്‍ പൊടി, 1 ടീസ്പൂണ്‍ മുളക് പൊടി, ഉപ്പു ഇവ ചേര്‍ത്ത് നന്നായിട്ടു മിക്‌സ് ചെയ്തു വെക്കുക. 15 മിനിറ്റ് ചിക്കനില്‍ മസാല പിടിച്ചതിനു ശേഷം, ഒരു പാനില്‍ എണ്ണ 1 1/2 ടീസ്പൂണ്‍ ഒഴിച്ച് നാലോ അഞ്ചോ മിനിറ്റ് വരെ ഫ്രൈ ചെയ്യുക.

ചിക്കന്‍ പകുതി വെന്തതിനു ശേഷം മാറ്റിവയ്ക്കുക. ഒരു ബിരിയാണി പോട്ടില്‍ 1 1/2 ടീസ്പൂണ്‍ ഓയില്‍ ഒഴിച്ചു ബെലീഫ്, ഗ്രാമ്പൂ, പട്ട, ഏലക്ക എന്നിവ ചൂടാക്കുക. പച്ചമുളക്, ബാക്കി ഇഞ്ചി വെളുത്തുളളി പേസ്റ്റ് ഇവ ചേര്‍ക്കുക. ഇതിലേക്ക് ഉരുളക്കിഴങ്ങു കഷ്ണങ്ങള്‍ ചേര്‍ക്കുക. കൂടാതെ, 1/2 ടീസ്പൂണ്‍ മഞ്ഞള്‍ പൊടി, 1 ടീസ്പൂണ്‍ മുളക് പൊടി, മല്ലി പൊടി, ജീരക പൊടി ഇവ ചേര്‍ത്ത് ചൂടാക്കുക. ഇതിലേക്ക് കഴുകി വൃത്തിയാക്കിയ അരി ചേര്‍ക്കുക. ശേഷം നന്നായിട്ടു മിക്‌സ് ചെയ്യുക.

6 ഗ്ലാസ് തിളച്ച വെള്ളം ചേര്‍ക്കുക. 1 ഗ്ലാസ് അരിക്ക് 2 ഗ്ലാസ് തിളച്ച വെള്ളം അതാണ് അളവ്. പാകത്തിന് ഉപ്പു ചേര്‍ത്ത് അടച്ചു വച്ച് 4-5 മിനിറ്റ് മീഡിയം തീയില്‍ വേവിക്കുക. അരി പകുതി വെന്താല്‍ പകുതി വേവിച്ചു വച്ച ചിക്കന്‍ ഗ്രേവിയോട് കൂടി അരിയുടെ മുകളില്‍ ചേര്‍ക്കുക. കുറച്ചു മല്ലിയില വിതറുക. അതിനു ശേഷം അടച്ചു വെച്ച് 8-9 മിനിറ്റ് വരെ ചെറുതീയില്‍ വേവിക്കുക. ഉരുളക്കിഴങ്ങും ചോറും ചിക്കനും എല്ലാം പാകത്തിന് വെന്തു കിട്ടുമ്പോള്‍ ചൂടോട് കൂടി വിളമ്പാം.