‘കശ്മീർ ഫയൽസ്’ വിദ്വേഷം ഉണർത്തുന്നു: ആരോപണവുമായി കോൺഗ്രസ് നേതാവ് ജയറാം രമേഷ്

ഡൽഹി: വിവേക് ​​അഗ്നിഹോത്രിയുടെ ‘ദ കശ്മീർ ഫയൽസ്’ എന്ന ചിത്രം, ചരിത്രത്തെ വളച്ചൊടിച്ച് അക്രമം പ്രോത്സാഹിപ്പിക്കാനുള്ള പ്രചരണമാണെന്ന് കോൺഗ്രസ് നേതാവ് ജയറാം രമേഷ്. താഴ്‌വരയിൽ നിന്നുള്ള കശ്മീരി പണ്ഡിറ്റുകളുടെ പലായനത്തെ അടിസ്ഥാനമാക്കിയുള്ള അഗ്നിഹോത്രിയുടെ ചിത്രത്തിന് പ്രധാനമന്ത്രി നരേന്ദ്ര മോദിയുടെ ഉൾപ്പെടെ, നിരവധി പേരുടെ അംഗീകാരമാണ് ലഭിച്ചുകൊണ്ടിരിക്കുന്നത്. എന്നാൽ, മുസ്ലീം സമുദായത്തിനും ഇടതുപക്ഷത്തിനും എതിരെ വിദ്വേഷം വളർത്താൻ സംവിധായകൻ ശ്രമിക്കുന്നതായാണ് വിമർശകരുടെ ആരോപണം.

‘ചില സിനിമകൾ മാറ്റത്തിന് പ്രചോദനം നൽകുന്നു. കശ്മീർ ഫയലുകൾ വിദ്വേഷം ഉണർത്തുന്നു. സത്യത്തിന് നീതി, പുനരധിവാസം, അനുരഞ്ജനം, സമാധാനം എന്നിവയിലേക്ക് നയിക്കാനാകും. പ്രചാരണം വസ്തുതകളെ വളച്ചൊടിക്കുന്നു, രോഷം ആളിക്കത്തിക്കാനും അക്രമത്തെ പ്രോത്സാഹിപ്പിക്കാനും ചരിത്രത്തെ വളച്ചൊടിക്കുന്നു. രാജ്യ സ്നേഹികൾ മുറിവുകൾ ഉണക്കാൻ ശ്രമിക്കുമ്പോൾ വിദ്വേഷ പ്രചാരകർ ഭയവും മുൻവിധിയും മുതലെടുത്ത്, ഭിന്നിപ്പിക്കുകയും ഭരിക്കുകയും ചെയ്യുന്നു. ജയറാം രമേഷ് വ്യക്തമാക്കി.

സമൂഹമാധ്യമങ്ങളിലൂടെ കെ സി വേണുഗോപാലിനെ വിമർശിച്ചു: രണ്ട് പേര്‍ക്ക് സസ്‌പെന്‍ഷന്‍

കശ്മീരിലെ മുസ്ലിങ്ങളുടെയും സിഖുകാരുടെയും ത്യാഗങ്ങളെ ചലച്ചിത്ര പ്രവർത്തകർ അവഗണിച്ചതിനാൽ സിനിമ സത്യത്തിൽ നിന്ന് വളരെ അകലെയാണെന്ന് ജമ്മു കശ്മീർ മുൻ മുഖ്യമന്ത്രി ഒമർ അബ്ദുള്ള നേരത്തെ വ്യക്തമാക്കിയിരുന്നു. കശ്മീരി പണ്ഡിറ്റുകളുടെ പലായനം നടക്കുമ്പോൾ തന്റെ പിതാവ് പാർട്ടി മേധാവി ഫാറൂഖ് അബ്ദുള്ള ജമ്മു കശ്മീർ മുഖ്യമന്ത്രിയായിരുന്നില്ലെന്നും ഒമർ അബ്ദുള്ള മാധ്യമപ്രവർത്തകരോട് പറഞ്ഞു.