ഉക്രൈനിൽ കുടുങ്ങിയ ഇന്ത്യക്കാരെ ഒഴിപ്പിക്കാൻ റഷ്യൻ സൈന്യം സഹായിച്ചു: വെളിപ്പെടുത്തൽ

കീവ്: അധിനിവേശം ആരംഭിച്ചതിന് ശേഷം ഇത് ആദ്യമായി റഷ്യ പിടിച്ചെടുത്ത തെക്കൻ ഉക്രേനിയൻ നഗരമായ കെർസണിൽ കുടുങ്ങിയ മൂന്ന് ഇന്ത്യക്കാരെ റഷ്യൻ സൈന്യത്തിന്റെ സഹായത്തോടെ ഒഴിപ്പിച്ചു. മോസ്കോയിലെ ഇന്ത്യൻ എംബസി ഈ മൂന്ന് ഇന്ത്യക്കാരെ, (ഒരു വിദ്യാർത്ഥിയെയും രണ്ട് ബിസിനസുകാരെയും) സിംഫെറോപോൾ (ക്രിമിയ), മോസ്കോ വഴി ഒഴിപ്പിക്കാൻ സഹായിക്കുകയായിരുന്നു. റഷ്യ പിടിച്ചെടുത്ത നഗരത്തിൽ നിന്നാണ് ഇവരെ റഷ്യൻ സൈന്യം ഒഴിപ്പിച്ചത്.

മോസ്കോയിലെ എംബസിയിലെ ഒരു നയതന്ത്രജ്ഞൻ പറഞ്ഞതായാണ് ഇന്ത്യൻ എക്സ്പ്രസ് റിപ്പോർട്ട് ചെയ്യുന്നത്. ‘ഞങ്ങൾ അവരെ സിംഫെറോപോളിലേക്കുള്ള ഒരു ബസിൽ കയറാൻ സൗകര്യമൊരുക്കി, തുടർന്ന് ട്രെയിനിൽ മോസ്കോയിലേക്ക് വരാൻ അവരെ സഹായിച്ചു, അതിനുശേഷം അവർ ചൊവ്വാഴ്ച വിമാനത്തിൽ കയറി. ഒരാൾ ചെന്നൈയിലേക്ക് പോകുന്ന ഒരു വിദ്യാർത്ഥിയായിരുന്നു. രണ്ട് പേർ അഹമ്മദാബാദിലേക്ക് പോകുന്ന വ്യവസായികളായിരുന്നു.’

ഇതാദ്യമായാണ്, ഉക്രേനിയൻ പ്രദേശത്ത് നിന്ന് ഇന്ത്യക്കാരെ ഒഴിപ്പിക്കാൻ റഷ്യൻ സൈന്യം സഹായം നൽകുന്നത്. കിഴക്കൻ അതിർത്തിയിലൂടെയും റഷ്യയിലൂടെയും ഇന്ത്യക്കാർ പുറപ്പെടുന്ന ആദ്യ സംഭവമാണിത്.
ഈ വർഷം ജനുവരി മുതൽ 22,000-ത്തിലധികം ഇന്ത്യക്കാർ, അവരിൽ 17,000-ത്തിലധികം പേർ ഇന്ത്യൻ സർക്കാർ ക്രമീകരിച്ച പ്രത്യേക വിമാനങ്ങൾ വഴി രക്ഷപ്പെട്ടിരുന്നു. ഇന്ത്യക്കാരെ ഒഴിപ്പിക്കുമ്പോൾ, ഉക്രെയ്‌നും റഷ്യയും വെടിനിർത്തൽ പാലിച്ചതിനാൽ രക്ഷാദൗത്യം നന്നായി നടന്നു.

രക്ഷാദൗത്യത്തിന്റെ വിജയത്തിനായി പ്രവർത്തിച്ച ഇന്ത്യൻ കമ്മ്യൂണിറ്റി നേതാക്കൾ, സന്നദ്ധ ഗ്രൂപ്പുകൾ, കമ്പനികൾ, സ്വകാര്യ വ്യക്തികൾ, സർക്കാർ ഉദ്യോഗസ്ഥർ എന്നിവരെ പ്രധാനമന്ത്രി അഭിനന്ദിച്ചിരുന്നു. രക്ഷാദൗത്യത്തിന്റെ ശ്രമങ്ങളെക്കുറിച്ച് സംസാരിച്ച പ്രധാനമന്ത്രി, ഉക്രെയ്‌നിലെയും അതിന്റെ അയൽരാജ്യങ്ങളിലെയും നേതാക്കളുമായുള്ള വ്യക്തിപരമായ ഇടപെടലുകളെ അനുസ്മരിക്കുകയും, എല്ലാ വിദേശ സർക്കാരുകളിൽ നിന്നും ലഭിച്ച പിന്തുണക്ക് നന്ദി അറിയിക്കുകയും ചെയ്തു.