തിരുവല്ല: തിരുവല്ല-കായംകുളം റോഡിലെ മണിപ്പുഴയില്‍ ഓടിക്കൊണ്ടിരിക്കുന്ന കാറിന് തീ പിടിച്ച് അപകടം. കാര്‍ യാത്രികന്‍ അത്ഭുതകരമായി രക്ഷപെട്ടു. അമ്പലപ്പുഴ കരൂര്‍ വടക്കേ പുളിയ്ക്കല്‍ വീട്ടില്‍ രാമകൃഷ്ണന്റെ ഉടമസ്ഥതയിലുളള ഹ്യൂണ്ടായ് ഐ ടെന്‍ കാറാണ് കത്തി നശിച്ചത്.
ശനിയാഴ്ച രാത്രി 9.15ഓടെ മണിപ്പുഴ ഹിന്ദുസ്ഥാന്‍ പെട്രോള്‍ പമ്പിന് സമീപം ആയിരുന്നു അപകടം.
കാറിന്റെ അടിയില്‍ നിന്നു പുക ഉയരുന്നതായി എതിരെ വന്ന വാഹന യാത്രക്കാര്‍ ആണ് പറഞ്ഞത്. തുടര്‍ന്ന്, കാര്‍ നിര്‍ത്തി രാമകൃഷ്ണന്‍ പുറത്തിറങ്ങി. തൊട്ടു പിന്നാലെ തീ ആളിപ്പടരുകയായിരുന്നു. കാര്‍ പൂര്‍ണമായും കത്തി നശിച്ചു.
തുടര്‍ന്ന്, തിരുവല്ലയില്‍ നിന്നും എത്തിയ അഗ്നി രക്ഷാ സേനാ ഉദ്യോഗസ്ഥര്‍ ചേര്‍ന്നാണ് തീയണച്ചത്. സംഭവത്തെ തുടര്‍ന്ന്, റോഡില്‍ അര മണിക്കൂറോളം ഗതാഗതം തടസപ്പെട്ടു.
Post Your Comments