നോട്ടയ്ക്ക് പോലും ഉണ്ടല്ലോ ഇതിനേക്കാൾ വോട്ട്: നാമാവശേഷമായി ശിവസേന

മുംബൈ: നിയമസഭാ തിരഞ്ഞെടുപ്പില്‍ ജനപിന്തുണ ഏതാണ്ട് ഇല്ലാതായ ശിവസേന അക്ഷരാർത്ഥത്തിൽ നാമാവശേഷമായി. ഗോവ, ഉത്തര്‍പ്രദേശ്, മണിപ്പൂര്‍ എന്നിവിടങ്ങളില്‍ നോട്ടയ്ക്ക് പോലും ശിവസേനയേക്കാൾ കൂടുതൽ വോട്ടുകൾ ലഭിച്ചെന്ന്, തെരഞ്ഞെടുപ്പ് കമ്മീഷന്റെ കണക്കുകള്‍ വ്യക്തമാക്കുന്നു.

Also read: അഫ്ഗാനിൽ മലയാളി ഐഎസ് ഭീകരൻ കൊല്ലപ്പെട്ടു: മരിച്ചത് എൻജിനീയറിങ് വിദ്യാർത്ഥി

മഹാരാഷ്ട്രയില്‍ എന്‍.സി.പിയുമായും കോണ്‍ഗ്രസുമായും സഖ്യംചെർന്ന് അധികാരത്തിലേറിയ സേന, മത്സരിച്ച മൂന്ന് സംസ്ഥാനങ്ങളിലും ഒരു സീറ്റ് പോലും നേടിയില്ല. ഗോവയില്‍ 10 സീറ്റുകളിലാണ് സേന സ്ഥാനാര്‍ത്ഥികളെ നിര്‍ത്തിയത്. എല്ലാവർക്കും കെട്ടിവെച്ച പണം നഷ്ടപ്പെട്ടു. കോര്‍ട്ടാലിം, ക്യൂപെം, വാസ്‌കോ ഡ ഗാമ, സാന്‍ക്വലിം എന്നിവിടങ്ങളില്‍ സേനയുടെ സ്ഥാനാർത്ഥികൾ 100 വോട്ട് പോലും തികച്ച് നേടിയില്ല. ഗോവയില്‍ പോള്‍ ചെയ്ത മൊത്തം വോട്ടർമാരിൽ 1.12 ശതമാനം നോട്ടയ്ക്ക് കുത്തിയപ്പോൾ, സേനയ്ക്ക് ലഭിച്ചത് വെറും 0.18 ശതമാനം വോട്ടാണ്.

മണിപ്പൂരില്‍ ശിവസേന 6 സീറ്റുകളില്‍ മത്സരിച്ചു. ഇവിടെ നോട്ടയ്ക്ക് 0.54 ശതമാനം വോട്ട് ലഭിച്ചപ്പോള്‍, 0.34 ശതമാനം വോട്ടുമായി സേന സംപൂജ്യരായി. ഉത്തര്‍പ്രദേശില്‍, സേന 0.03 ശതമാനം വോട്ടുകള്‍ നേടി മത്സരരംഗത്ത് നിന്ന് മാഞ്ഞുപോയപ്പോൾ, നോട്ട 0.69 ശതമാനം വോട്ടുകള്‍ ആണ് നേടിയത്.