‘ഭർത്താവും വീട്ടുകാരും നിരന്തരം മർദ്ദിച്ചിരുന്നു’:മലപ്പുറത്തെ യുവതിയുടെ ആത്മഹത്യയ്ക്ക് പിന്നിൽ സ്ത്രീധനപീഡനമെന്ന് പരാതി

മലപ്പുറം: മലപ്പുറത്ത് യുവതി ട്രെയിനിന് മുന്നിൽ ചാടി ആത്മഹത്യ ചെയ്തതിന് പിന്നില്‍ സ്ത്രീധന പീഡനമെന്ന് പരാതി. പണവും സ്വർണവും ആവശ്യപ്പെട്ട് ഭർത്താവും വീട്ടുകാരും ലിജിനയെ നിരന്തരം മർദ്ദിച്ചിരുന്നെന്ന് സഹോദരി ബിജിന പറഞ്ഞു. ചൊവ്വാഴ്ചയാണ് ചാലിയം സ്വദേശി ലിജിന ട്രെയിനിന് മുന്നിൽ ചാടി ആത്മഹത്യ ചെയ്തത്.

ഭർത്താവും വീട്ടുകാരും ലിജിനയെ കൊടിയ പീഡനത്തിനിരയാക്കിയിരുന്നുവെന്ന് ബിജിന പറഞ്ഞു. വിവാഹ സമയത്ത് ഓട്ടോറിക്ഷ ഡ്രൈവറായിരുന്ന ഭര്‍ത്താവ് ഷാലു പിന്നീട് ക്വാറി ബിസിനസിലേക്ക് മാറി. സാമ്പത്തികമായി മെച്ചപെട്ടതോടെയാണ് ഷാലു കൂടുതല്‍ സ്വര്‍ണാഭരണങ്ങളും പണവും ആവശ്യപെട്ട് സഹോദരിയെ ഉപദ്രവിക്കാൻ തുടങ്ങിയതെന്നും ബിജിന പറയുന്നു. ‌പീഡനം സഹിക്കാൻ കഴിയാതെയാണ് ലിജിന ട്രെയിനിന് മുന്നിൽ ചാടി മരിച്ചതെന്നും ബിജിന പറഞ്ഞു.

Read Also : IPL Auction 2022 – ദേവ്ദത്ത് പടിക്കൽ സഞ്ജുവിനൊപ്പം: ഫ്രാഞ്ചൈസികൾ സ്വന്തമാക്കിയ മറ്റ് താരങ്ങൾ ഇവരാണ്

അതേസമയം സംഭവത്തെക്കുറിച്ച് അന്വേഷണം ആവശ്യപെട്ട് കുടുംബം എസ് പി അടക്കമുള്ള പൊലീസ് ഉദ്യോഗസ്ഥര്‍ക്കും വനിത കമ്മീഷനും പരാതി നല്‍കി.