‘ജീവൻ വേണമെങ്കിൽ തരാം, പക്ഷെ ഹിജാബ് ഉപേക്ഷിക്കില്ല’: കോൺഗ്രസ് എം.എൽ.എ ഖനീസ് ഫാത്തിമ, കർണാടകയിൽ ഹിജാബ് വിഷയം പുകയുമ്പോൾ

ഉഡുപ്പി: കർണാടകയിൽ ഹിജാബിനെ ചൊല്ലി തർക്കം തുടരുന്നതിനിടെ സർക്കാർ പുറത്തുവിട്ട പുതിയ ഉത്തരവിനെതിരെ പ്രതിഷേധവുമായി കോൺഗ്രസ് എം.എൽ.എ ഖനീസ് ഫാത്തിമ. ഇവർക്കൊപ്പം മറ്റ് അനുയായികളും സർക്കാരിനെതിരെ പ്രതിഷേധ പ്രകടനം നടത്തി. യൂണിഫോമിന് ചേരുന്ന ഹിജാബുകൾ അനുവദിക്കണമെന്നും ജീവൻ പോയാലും ഹിജാബ് ഉപേക്ഷിക്കില്ലെന്നും ഇവർ പ്രതികരിച്ചു.

‘പെൺകുട്ടികൾ അടിച്ചമർത്തപ്പെടുകയാണ്. പരീക്ഷയ്ക്ക് 2 മാസം മുമ്പ് സ്കൂളുകളിൽ അവരുടെ പ്രവേശനം നിഷേധിക്കപ്പെടുന്നു, അതിനാൽ എല്ലാ ജാതിയിലും മതത്തിലും പെട്ട ആളുകൾ കലബുറഗിയിലെ ഡിസി ഓഫീസിൽ ഒത്തുകൂടി പ്രതിഷേധം ഉയർത്തുകയാണ്. യൂണിഫോമിന്റെ നിറത്തിനനുസരിച്ച് ഹിജാബിന്റെ കളർ മാറ്റാൻ തയ്യാറാണെന്നും പക്ഷെ അത് പൂർണമായും ഒഴിവാക്കാനാണ് പറയുന്നതെങ്കിൽ അംഗീകരിക്കാൻ കഴിയില്ല. ഞാൻ നിയമസഭയിലും ഹിജാബ് ധരിക്കുന്നു, അവർക്ക് കഴിയുമെങ്കിൽ അവർക്ക് എന്നെ തടയാം’, ഖനീസ് ഫാത്തിമ പറഞ്ഞു.

Also Read:സൂപ്പര്‍ മാര്‍ക്കറ്റിൽ വൈന്‍ വില്‍പനയ്ക്ക് അനുമതി: സർക്കാരിനെതിരെ അണ്ണാ ഹസാരെയുടെ സമര പ്രഖ്യാപനം

അതേസമയം, മുസ്ലീം പെൺകുട്ടികൾ ഹിജാബ് ധരിച്ച് കോളേജ് യൂണിഫോമിന്റെ ചട്ടങ്ങൾ ലംഘിക്കുന്നതിൽ പ്രതിഷേധിച്ച് ആണ് സർക്കാർ പുതിയ ഉത്തരവ് പുറത്തിറക്കിയത്. വിദ്യാഭ്യാസ സ്ഥാപനങ്ങളില്‍ സമത്വും സമാധാനാന്തരീക്ഷവും തകര്‍ക്കുന്ന വസ്ത്രങ്ങള്‍ ധരിക്കരുതെന്ന് ‘ഹിജാബ് വിവാദവുമായി’ ബന്ധപ്പെട്ട് പുറത്തുവന്ന ഉത്തരവിൽ പറയുന്നു. സ്‌കൂള്‍ അധികൃതര്‍ നിർദേശിക്കാത്ത സാഹചര്യത്തില്‍ സമത്വത്തിനും അഖണ്ഡതയ്ക്കും പൊതുക്രമ സമാധാനത്തിനും ഭംഗം വരുത്തുന്ന വസ്ത്രങ്ങള്‍ ധരിക്കരുതെന്ന് ഉത്തരവില്‍ പറയുന്നു.

മുസ്ലീം പെൺകുട്ടികൾ കോളേജ് യൂണിഫോം ചട്ടങ്ങൾ പാലിക്കാൻ വിസമ്മതിക്കുകയും ഹിജാബ് ധരിച്ചെത്തുകയും ചെയ്തതിനെ തുടർന്നാണ് ഉഡുപ്പിയിൽ പ്രതിഷേധം രൂക്ഷമായത്. ആൺകുട്ടികൾ കാവി ഷോൾ ധരിച്ച് എത്തിയതോടെ ഹിജാബ്, കാവി ഷോൾ, എന്നിവ ധരിക്കുന്നത് നിരോധിക്കാൻ കോളേജ് അധികൃതർ നിർബന്ധിതരാവുകയായിരുന്നു. മറ്റ് നിരവധി വിദ്യാർത്ഥികളുടെ ഭാവി അപകടത്തിലാക്കുകയാണ്‌ എന്നറിഞ്ഞിട്ടും ഇതിനെതിരെ മുസ്ലീം വിദ്യാർത്ഥികൾ പിന്നോട്ടില്ലെന്ന് തീരുമാനിച്ച് പ്രതിഷേധം ശക്തമാക്കുകയായിരുന്നു. ഇതോടെയാണ്, ശർക്കര വിഷയത്തിൽ ഇടപെട്ടതും പുതിയ ഉത്തരവ് പുറപ്പെടുവിച്ചതും.