അഞ്ചിൽ നാലിനും പേരുകളുണ്ട്, 16347/16348 നമ്പർ ട്രെയിന് പേരില്ലാ , ‘ചന്ദ്രഗിരി എക്‌സ്പ്രസ്’ എന്നാക്കണം: രാജ്‌മോഹന്‍

മംഗലാപുരത്ത് നിന്നും പുറപ്പെട്ട് തിരുവനന്തപുരം വരെയും തിരിച്ചും സഞ്ചരിക്കുന്ന 16347/16348 ട്രെയിനിനു പേര് നല്‍കണമെന്ന ആവശ്യവുമായി കാസര്‍ഗോഡ് എംപി രാജ്‌മോഹന്‍ ഉണ്ണിത്താന്‍. ട്രെയിനിന് ‘ചന്ദ്രഗിരി എക്‌സ്പ്രസ്’ എന്ന് പേര് നല്‍കണമെന്നും അതിന്റെ കാരണവും എംപി പറയുന്നു. ഇക്കാര്യം ആവശ്യപ്പെട്ട് കേന്ദ്ര റെയില്‍വേ മന്ത്രിക്കും റെയില്‍ മന്ത്രാലയത്തിന് കീഴിലുള്ള ബന്ധപ്പെട്ട എല്ലാ ഓഫീസുകളിലേക്കും നല്‍കിയിട്ട് ഉണ്ടെന്നും അദ്ദേഹം ചൂണ്ടിക്കാട്ടുന്നു.

read also: ലക്ഷദ്വീപിലേക്കുള്ള എല്ലാ അക്കാദമിക് സേവനങ്ങളും മരവിപ്പിച്ച് കാലിക്കറ്റ് സര്‍വകലാശാല

കുറിപ്പ് പൂർണ്ണ രൂപം

മംഗലാപുരം സെൻട്രൽ റെയിൽവേ സ്റ്റേഷനിൽ നിന്ന് ആരംഭിച്ച് എന്റെ നിയോജക മണ്ഡലമായ കാസർകോട് ഉൾപ്പെടുന്ന കേരളത്തിന്റെ വടക്കൻ ഭാഗങ്ങളെയും തലസ്ഥാന നഗരമായ തിരുവനന്തപുരത്തേക്കും ബന്ധിപ്പിക്കുന്ന അഞ്ച് ട്രെയിനുകളിൽ നാല് ട്രെയിനുകൾക്ക് പേരുകളുണ്ട്. പരശുരാമന്റെയും മാവേലിയുടെയും അടക്കം പുരാണ കഥാപാത്രങ്ങളുടെ പേരുകൾ നൽകുമ്പോൾ, രണ്ട് ട്രെയിനുകൾക്ക് കേരളത്തിന്റെ വടക്ക് ഭാഗത്തുള്ള രണ്ട് പ്രദേശങ്ങളുടെ പേരാണ് നൽകിയിരിക്കുന്നത്. മലബാറും ഏറനാടും.

എന്നാൽ തിരുവനന്തപുരത്ത് നിന്ന് രാത്രി 8.45ന് പുറപ്പെട്ട് മംഗലാപുരം സെൻട്രലിൽ നിന്ന് ഉച്ചയ്ക്ക് 2.20ന് മടങ്ങുന്ന ട്രെയിനിന് നമ്പർ: 16347/16348 പേരില്ല. ഈ തീവണ്ടി അതിന്റെ ലക്ഷ്യസ്ഥാനങ്ങളിൽ മാത്രം അറിയപ്പെടുന്നു. മറ്റ് നിരവധി ട്രെയിനുകളും ഈ ലക്ഷ്യസ്ഥാനങ്ങളിലേക്ക് പോകുന്നതിനാൽ, അന്വേഷണത്തിലും അറിയിപ്പുകളിലും യാത്രക്കാർ ആശയക്കുഴപ്പത്തിലാകുന്നു. ട്രെയിനുകളുടെ അഞ്ചക്ക നമ്പർ ഓർത്തെടുക്കാൻ യാത്രക്കാർ ബുദ്ധിമുട്ടുന്നു എന്ന് മനസിലാക്കിയതിന്റെ അടിസ്ഥാനത്തിൽ ഈ ആശയക്കുഴപ്പം തീർക്കാൻ സംസ്ഥാനത്തിന്റെ വടക്കൻ ഭാഗത്ത് ഒഴുകുന്ന ഒരു പ്രധാന നദിയുടെ പേര് കൂടി ചേർത്ത് ‘ചന്ദ്രഗിരി എക്‌സ്‌പ്രസ്’ എന്ന് പ്രസ്തുത തീവണ്ടിക്ക് നൽകണമെന്ന് എല്ലാ മേഖലകളിൽ നിന്നുമുള്ള ആളുകളിൽ നിന്നും വളരെക്കാലമായി ഉയർന്ന ആവശ്യമാണല്ലോ

എന്തുകൊണ്ട് ചന്ദ്രഗിരി:? ചന്ദ്രഗിരിയുടെ അർത്ഥം “പർവതത്തിലെ ചന്ദ്രൻ” എന്നാണ്. ചന്ദ്രഗിരി നദി കർണാടകയിലെ പുണ്യസ്ഥലമായ തലകാവേരിയിൽ നിന്ന് ആരംഭിച്ച് കേരളത്തിലൂടെ ഒഴുകുന്നു, ഇത് ദക്ഷിണേന്ത്യയിലെ ഏറ്റവും വലിയ നദികളിലൊന്നാണ്. പേര് വളരെ ഹൃദ്യവുമാണ്.
ഇതൊരു പുതിയ നിർദ്ദേശമായി കണക്കിലെടുത്തു പഴയ കണ്ണൂർ തിരുവനന്തപുരം എക്സ്പ്രസ്സ് ട്രെയിനിന് “ചന്ദ്രഗിരി എക്സ്പ്രസ്സ്’ എന്ന് നാമകരണം ചെയ്യണം എന്ന് ആവശ്യപ്പെട്ടു കൊണ്ട് ഒരു പ്രപ്പോസൽ ബഹു കേന്ദ്ര റെയിൽവേ മന്ത്രിക്കും റെയിൽ മന്ത്രാലയത്തിന് കീഴിലുള്ള ബന്ധപ്പെട്ട എല്ലാ ഓഫീസുകളിലും നൽകുകയുണ്ടായി ഈ നിർദ്ദേശത്തിൽ അനുകൂലമായ തീരുമാനം എടുക്കുകയും 16347/16348 തീവണ്ടികൾക്കു ചന്ദ്രഗിരി എക്സ്പ്രസ്സ് എന്ന് പേര് നൽകും എന്ന് പ്രതീക്ഷിക്കുന്നു.ഈ ആവശ്യത്തിലേക്കു തുടർ നടപടികൾ സ്വീകരിക്കുന്നതിന് ആവശ്യം വേണ്ട ഫോളോ അപ്പ് എന്റെ ഓഫീസിൽ നിന്നും ഉണ്ടാകുന്നതാണ് എന്ന് അറിയിക്കുന്നു
നിങ്ങളുടെ
രാജ്‌മോഹൻ ഉണ്ണിത്താൻ എംപി (കാസർഗോഡ്)