മട്ടാഞ്ചേരി: മുങ്ങിയ ബോട്ടിൽ തട്ടി വീണ്ടും മത്സ്യ ബന്ധനബോട്ട് അപകടത്തിൽപെട്ടു. കൊച്ചി അഴിമുഖത്താണ് അപകടം. ആളപായമില്ല. തുടർന്ന് മറ്റൊരു ബോട്ടിൽ തൊഴിലാളികളെ രക്ഷപ്പെടുത്തി കരക്കെത്തിച്ചു.
ബുധനാഴ്ച രാത്രിയാണ് സംഭവം. മത്സ്യബന്ധനം കഴിഞ്ഞ് മടങ്ങുകയായിരുന്ന വിഷ്ണു എന്ന ബോട്ട് ആണ് അപകടത്തിൽപെട്ടത്. എൽ.എൻ.ജി ടെർമിനലിന് സമീപം മുങ്ങിക്കിടക്കുന്ന കുട്ടി ആണ്ടവൻ എന്ന ബോട്ടിലെ വയർ റോപ്പ് ചുറ്റി വിഷ്ണു ബോട്ട് കുടുങ്ങിക്കിടക്കുകയായിരുന്നു.
അതേസമയം കടൽ പ്രക്ഷുബ്ധമായതിനാൽ രക്ഷാപ്രവർത്തനവും തടസ്സപ്പെട്ടു. തുടർന്ന് രക്ഷാപ്രവർത്തനത്തിന് കോസ്റ്റൽ പൊലീസും മറൈൻ എൻഫോഴ്സ്മെൻറുമെത്തി ബോട്ടിലെ 12 തൊഴിലാളികളെയും രക്ഷപ്പെടുത്തുകയായിരുന്നു. രുദ്രാക്ഷം എന്ന മറ്റൊരു ബോട്ടിന്റെ സഹായത്തോടെ പുലർച്ച മൂന്നോടെ ബോട്ട് രക്ഷപ്പെടുത്തി വൈപ്പിൻ കാളമുക്ക് ഹാർബറിൽ കൊണ്ടുവന്നു. കാളമുക്ക് സ്വദേശി അനീഷ് ഗോപിയുടേതാണ് അപകടത്തിലെ പെട്ട ബോട്ട്. രണ്ട് ലക്ഷം രൂപയുടെ നഷ്ടമുണ്ടെന്നാണ് പ്രാഥമിക നിഗമനം.
Post Your Comments