റെ​യി​ൽ​വേ ലെ​വ​ൽ ക്രോ​സി​ലേ​ക്ക് കാ​ർ ഇ​ടി​ച്ചു​ക​യ​റി അപകടം; ഒഴിവായത് വൻദുരന്തം

ക​ഴ​ക്കൂ​ട്ടം: കാ​ർ ലെ​വ​ൽ ക്രോ​സി​ലേക്ക് ഇടിച്ചു കയറി ഗേ​റ്റ് ത​ക​ർ​ത്തു. ട്രെ​യി​ൻ ക​ട​ന്നു​പോ​കു​ന്ന​തി​ന്​ റെ​യി​ൽ​വേ ലെ​വ​ൽ ക്രോ​സ് അ​ട​യ്​​ക്കു​ന്ന​തി​നി​ട​യി​ലാണ് സംഭവം. ട്രെ​യി​ൻ എ​ത്താ​ത്ത​തി​നാ​ൽ വ​ൻ​ദു​ര​ന്തം ഒ​ഴി​വാ​കുകയായിരുന്നു. അപകടത്തിൽ ആ​ർ​ക്കും പ​രി​ക്കി​ല്ല. ഞാ​യ​റാ​ഴ്​​ച രാ​ത്രി 9.15ന് ആണ് അപകടം. ​കു​ള​ത്തൂ​ർ സ്​​റ്റേ​ഷ​ൻ​ക​ട​വ് റെ​യി​ൽ​വേ ലെ​വ​ൽ ക്രോ​സി​ലാ​ണ് സം​ഭ​വം.

ട്രെ​യി​നിന്റെ വ​ര​വ​റി​യി​ച്ച് സ​ന്ദേ​ശം വ​ന്നു. തൊട്ടു പിന്നാലെ അ​ലാ​റം മു​ഴ​ക്കി ഗേ​റ്റ് കീ​പ്പ​ർ അ​വ​സാ​ന​ത്തെ വാ​ഹ​ന​ത്തെ​യും ക​ട​ത്തി​വി​ട്ട് ഗേ​റ്റ് താ​ഴ്ത്തി ലോ​ക്ക് ചെ​യ്യു​കയായിരുന്നു. ഇതിനിടെ എ​ത്തി​യ കാ​റാ​ണ് നി​യ​ന്ത്ര​ണം ​തെ​റ്റി കി​ഴ​ക്ക് വ​ശ​ത്തെ ഗേ​റ്റ് ത​ക​ർ​ത്ത് റെ​യി​ൽ​വേ പാ​ള​ത്തി​ന് തൊ​ട്ട​ടു​ത്താ​യി വ​ന്നു​നി​ന്ന​ത്.

Read Also: ‘67000 രൂപ ഉടൻ തിരിച്ചുതരും, ആരെയും അറിയിക്കരുത്’ : രണ്ട് പേജിൽ ക്ഷമാപണ കുറിപ്പ് എഴുതി വെച്ച് പണം കവർന്ന് കള്ളൻ

സംഭവസ്ഥലത്ത് ഉണ്ടായിരുന്നവർ ഉ​ട​ൻ ത​ന്നെ സ്ഥ​ല​ത്തെ​ത്തി കാ​റി​ലു​ള്ള​വ​രെ പു​റ​ത്തെ​ത്തി​ച്ചു. ഗേ​റ്റിന്റെ ക​ട്ടി​യു​ള്ള ഉ​രു​ക്ക് പൈ​പ്പി​ൽ ത​ട്ടി​നി​ന്ന​തി​നാ​ൽ കാ​ർ പാ​ള​ത്തി​ലേ​ക്ക് പോ​കാ​ത്ത​തി​നാ​ൽ ട്രെ​യി​നി​ന് ത​ട​സ്സം കൂ​ടാ​തെ പോ​കാ​ൻ ക​ഴി​ഞ്ഞു. തുടർന്ന് തു​മ്പ പൊ​ലീ​സ് സ്ഥ​ല​ത്തെ​ത്തി കാ​ർ മാ​റ്റി.