പഞ്ചാബിലെ കർഷക സംഘടനകളുടെ ആവശ്യം, യോഗേന്ദ്ര യാദവിനെ സംയുക്ത കിസാൻ മോർച്ച സസ്പെൻഡ് ചെയ്തു

ന്യൂഡൽഹി: കേന്ദ്രസർക്കാരിന്റെ മൂന്ന് കാർഷിക നിയമങ്ങൾക്കെതിരെ പ്രതിഷേധം സംഘടിപ്പിക്കുന്ന പ്രധാന കർഷക സംഘടനയായ സംയുക്ത കിസാൻ മോർച്ച (എസ്‌കെഎം) യോഗേന്ദ്ര യാദവിനെ ഒരു മാസത്തേക്ക് സസ്പെൻഡ് ചെയ്തു. സംയുക്ത കിസാൻ മോർച്ചയുടെ ഒരു പ്രതിഷേധ സ്ഥലമായിരുന്ന സിംഗുവിൽ ലഖ്ബീർ സിങ്ങിനെ അടുത്തിടെ നിഹാംഗ് സിഖുകാർ കൈയും കാലും വെട്ടിമാറ്റി ക്രൂരമായി കൊലപ്പെടുത്തിയത് വലിയ വിവാദമായിരുന്നു.

ഇതിനിടെയാണ് യോഗേന്ദ്രയാദവിനെ സസ്‌പെൻഡ് ചെയ്തുകൊണ്ടുള്ള വിവാദ തീരുമാനം. ‘അദ്ദേഹത്തിന് സംയുക്ത കിസാൻ മോർച്ചയുടെ യോഗങ്ങളിലും മറ്റ് പ്രവർത്തനങ്ങളിലും പങ്കെടുക്കാൻ കഴിയില്ല,’ യോഗേന്ദ്ര യാദവിനെ സസ്‌പെൻഡ് ചെയ്യാനുള്ള തീരുമാനം എസ്‌കെഎമ്മിന്റെ ജനറൽ ബോഡി യോഗത്തിൽ എടുത്ത ശേഷം ഒരു കർഷക നേതാവ് മാധ്യമങ്ങളോട് പറഞ്ഞു. യോഗേന്ദ്ര യാദവ് എസ്‌കെ‌എമ്മിന്റെ കോർ കമ്മിറ്റി അംഗമായിരുന്നു, കർഷക പ്രതിഷേധത്തിൽ സജീവമായി പങ്കെടുക്കുകയും നിരവധി സന്ദർഭങ്ങളിൽ കേന്ദ്രസർക്കാരിനെതിരെ ആക്രമണം നടത്തുകയും ചെയ്തിരുന്നു.

എന്നിട്ടും അദ്ദേഹത്തെ എന്തിനു സസ്‌പെൻഡ് ചെയ്തു എന്നാണ് പലരും ചിന്തിച്ചത്. മാധ്യമ റിപ്പോർട്ടുകൾ പ്രകാരം, സംയുക്ത കിസാൻ മോർച്ച 2021 ഒക്ടോബർ 21 -ന് ഒരു മീറ്റിംഗ് നടത്തി. യോഗത്തിൽ, കർഷക പ്രക്ഷോഭകർ നടത്തിയ ലഖിംപൂർ ഖേരി അക്രമത്തിൽ കൊല്ലപ്പെട്ട ബിജെപി പ്രവർത്തകരുടെ കുടുംബങ്ങളുമായി കൂടിക്കാഴ്ച നടത്തിയതിന് യോഗേന്ദ്ര യാദവിനോട് ആദ്യം ക്ഷമ ചോദിക്കാൻ ആവശ്യപ്പെട്ടു. കര്‍ഷകര്‍ക്ക് മേല്‍ ഇടിച്ചുകയറ്റിയ വാഹനത്തിന്‍റെ ഡ്രൈവര്‍ ശുഭം മിശ്രയാണെന്ന് ആരോപണമുയര്‍ന്നിരുന്നു.

സമരം നടത്തിയ കര്‍ഷകരും അവ‍ര്‍ക്ക് വേണ്ടി പ്രവര്‍ത്തിച്ച ഗുണ്ടകളും ചേര്‍ന്നാണ് ശുഭം മിശ്രയെ അടിച്ചു കൊന്നത്. കര്‍ഷക പ്രക്ഷോഭം നയിക്കുന്ന സംയുക്ത കിസാന്‍ മോര്‍ച്ചയിലെ നേതാവ് കൂടിയാണ് യോഗേന്ദ്ര യാദവ്. യോഗേന്ദ്ര യാദവ് മാപ്പ് പറയാൻ വിസമ്മതിച്ചപ്പോൾ, കർഷക പ്രക്ഷോഭകർ അടിച്ചു കൊലപ്പെടുത്തിയവരുടെ കുടുംബങ്ങളെ കണ്ടതിന് ശിക്ഷയായി ഒരു മാസത്തേക്ക് സസ്പെൻഡ് ചെയ്യാൻ എസ്കെഎം തീരുമാനിക്കുകയായിരുന്നു. ഇന്ത്യാ ടുഡേ പറയുന്നതനുസരിച്ച്, യോഗേന്ദ്ര യാദവ് കുടുംബങ്ങളെ കണ്ടതിന് മാപ്പ് പറയാൻ വിസമ്മതിച്ചെങ്കിലും അവരുടെ കുടുംബങ്ങളെ കാണുന്നതിന് മുമ്പ് തന്റെ സഹപ്രവർത്തകരോടും എസ്‌കെഎമ്മിനോടും ആലോചിക്കാത്തതിന് അദ്ദേഹം ക്ഷമാപണം നടത്തി.

എന്നാൽ, ബിജെപി പ്രവർത്തകരുടെ കുടുംബാംഗങ്ങളെ കണ്ടത് തെറ്റാണെന്നു സമ്മതിക്കാത്തതിനാൽ സംയുക്ത കിസാൻ മോർച്ച അദ്ദേഹത്തെ സസ്‌പെൻഡ് ചെയ്യുകയായിരുന്നു. യോഗേന്ദ്ര യാദവിനെ സസ്‌പെൻഡ് ചെയ്തത് പഞ്ചാബ് ആസ്ഥാനമായുള്ള നിരവധി കർഷക സംഘടനകളുടെ ആവശ്യപ്രകാരമാണെന്നും റിപ്പോർട്ടുണ്ട്. കോര്‍ കമ്മിറ്റിയില്‍ നിന്ന് ഒരു മാസത്തേക്ക് മാറ്റിനിര്‍ത്തിയാണ് ശിക്ഷാനടപടി. ശിക്ഷയുടെ ഭാഗമായി പ്രക്ഷോഭ വേദികളില്‍ പ്രസംഗിക്കാനും യോഗേന്ദ്ര യാദവിനെ അനുവദിക്കില്ല.