ആലപ്പുഴയിൽ രണ്ട് ഹൗസ്ബോട്ടുകൾ കത്തിനശിച്ചു: വൻ നാശനഷ്ടം, ദുരൂഹതയെന്ന് ഉടമ

ആലപ്പുഴ: ആലപ്പുഴ കന്നിട്ട ജെട്ടിക്കു സമീപത്തെ കായലിൽ നങ്കൂരമിട്ടിരുന്ന രണ്ട് ഹൗസ്ബോട്ടുകൾ കത്തിനശിച്ചു. ഇന്നലെ പുലർച്ചെയായിരുന്നു സംഭവം. അപകടം നടക്കുമ്പോൾ ഹൗസ്ബോട്ടിനുള്ളിൽ ആരുമുണ്ടായിരുന്നില്ല. ഇത് വൻ ദുരന്തം ഒഴിവാക്കി. സംഭവത്തിൽ 1.5 കോടി രൂപയുടെ നാശനഷ്ടമുണ്ടായതായി ഉടമ വ്യക്തമാക്കി.

ഫയർഫോഴ്സും നാട്ടുകാരും ചേർന്ന് തീയണയ്ക്കാൻ ശ്രമിച്ചെങ്കിലും ബോട്ടുകൾ പൂർണമായും കത്തിനശിക്കുകയായിരുന്നു. സംഭവത്തിൽ ദുരൂഹതയുണ്ടെന്ന് ഉടമകൾ പരാതിപ്പെട്ടു. ആലപ്പുഴ കൊമ്മാടി സ്വദേശിയായ നിയാസിന്റെ ഉടമസ്ഥതയിലുള്ള 6 ബോട്ടുകളിൽ രണ്ട് എണ്ണമാണ് കത്തിനശിച്ചത്. തീ പിടുത്തമുണ്ടായപ്പോൾ നിയാസും തൊഴിലാളികളും മറ്റൊരു ബോട്ടിലായിരുന്നു. തീ കണ്ട് നാട്ടുകാർ ഓടിയെത്തുകയായിരുന്നു.