കോവിഡ് വ്യാപനം​: ഒമാനിൽ ​കർഫ്യൂ സമയം നീട്ടി

മസ്​കത്ത്​: കോവിഡ്​ വ്യാപന സാഹചര്യത്തിൽ മെയ് 8 മുതൽ 15വരെ വാണിജ്യ പ്രവർത്തനങ്ങൾ പൂർണമായും നിർത്തിവെക്കാനും കർഫ്യൂ സമയം വൈകുന്നേരം ഏഴുമുതൽ രാവിലെ നാലുവരെയാക്കാനും സുപ്രീംകമ്മിറ്റി തീരുമാനിച്ചതായി അറിയിക്കുകയുണ്ടായി. ആവശ്യ വസ്​തുക്കളൊഴികെ എല്ലാ വാണിജ്യ പ്രവർത്തനങ്ങളും നിരോധിക്കാനാണ്​ തീരുമാനിച്ചിട്ടുള്ളത്​. ഭക്ഷ്യകടകൾ, എണ്ണ പമ്പുകൾ, ആരോഗ്യ ക്ലിനികുകളും ആശുപത്രികളും, ഫാർമസികൾ, ഹോം ഡെലിവറി സേവനങ്ങൾ എന്നിവയെയാണ്​ നിരോധത്തിൽ നിന്ന്​ ഒഴിവാക്കിയിരിക്കുന്നത്.

ഇൗദുൽ ഫിത്വർ കടന്നു വരുന്ന ആഴ്​ചയലിലാണ്​ ശക്​തമായ നിയന്ത്രണം​ സർക്കാർ പ്രഖ്യപിച്ചിരിക്കുന്നത്​. മെയ്​ 11മുതൽ മൂന്നുദിവസം ജീവനക്കാർ തൊഴിലിടങ്ങളിൽ വരേണ്ടതില്ലെന്നും സർക്കാർ സ്​ഥാപനങ്ങളിൽ വിദൂര തൊഴിൽ സംവിധാനം നടപ്പിലാക്കാനും ഉത്തവിലുണ്ട്​. സ്വകാര്യ സ്​ഥാപനങ്ങളോടും ഇൗ ദിവസങ്ങളിൽ ​േജാലി സ്​ഥലങ്ങളിലേക്ക്​ വരേണ്ട തൊഴിലാളികളുടെ എണ്ണം പരിമിതപ്പെടുത്താൻ നിർദ്ദേശം നൽകി​.

ഈദുൽ ഫിത്വറി​ന്​ പെരുന്നാൾ നമസ്​കാരവും പരമ്പരാഗത ഈദ് വിപണികളും നടത്തേണ്ടതില്ലെന്നും ബീച്ചുകൾ, പാർക്കുകൾ, പൊതുസ്​ഥലങ്ങൾ എന്നിവയുൾപ്പെടെ വിവിധയിടങ്ങളിൽ ഒത്തുചേരുന്നത് നിരോധിക്കാനും തീരുമാനിച്ചിട്ടുണ്ട്​. കുടുംബങ്ങളുടെ കൂടിച്ചേരലിനും കൂട്ടായുള്ള ആഘോഷ പരിപാടികൾക്കും നിയന്ത്രണം ബാധകമായിരിക്കും​.

നിലവിൽ രാത്രി ഒമ്പതു മുതൽ രാവിലെ നാലു വരെയാണ്​ കർഫ്യൂ നിലവിലുള്ളത്​. എന്നാൽ പകൽ വ്യപാരത്തിന്​ ഇപ്പോൾ തടസമില്ല. ഒമാനിലെ ഏറ്റവും പ്രധാനപ്പെട്ട ആഘോഷ സീസണായ പെരുന്നാൾ സന്ദർഭത്തിൽ കോവിഡ്​ വ്യാപനത്തിന്​ കാരണമാകുന്ന സാഹചര്യങ്ങളെ തടയാനുദ്ദേശിച്ചാണ്​ പുതിയ നിയന്ത്രണങ്ങൾ പ്രഖ്യാപിച്ചത്​.