കഴിഞ്ഞ 24 മണിക്കൂറിനിടെ രാജ്യത്ത് 62,714 പേർക്ക് കോവിഡ്

ന്യൂഡൽഹി: രാജ്യത്ത് കൊവിഡ് വ്യാപനം അതീവ രൂക്ഷം. കഴിഞ്ഞ 24 മണിക്കൂറിനിടെ 62,714 പേർക്കാണ് രാജ്യത്ത് രോഗം സ്ഥിരീകരിച്ചതെന്ന് കേന്ദ്ര ആരോഗ്യമന്ത്രാലയം അറിയിക്കുകയുണ്ടായി. ഇതോടെ ആകെ രോഗബാധിതരുടെ എണ്ണം 1,19,71,624 ആയി ഉയർന്നിരിക്കുന്നു. നിലവിൽ 4,86,310 പേരാണ് കോവിഡ് ചികിത്സയിലുള്ളത്.

ഇന്നലെ മാത്രം 312 പേരാണ് കൊറോണ വൈറസ് രോഗബാധ മൂലം മരിച്ചത്. ഇതോടെ ആകെ മരണം 1,61,552 ആയി ഉയർന്നു. കൊറോണ വൈറസ് രോഗ വ്യാപനം രൂക്ഷമായ 12 സംസ്ഥാന, കേന്ദ്രഭരണപ്രദേശങ്ങളിലെ ഉന്നത ഉദ്യോഗസ്ഥരുടെ യോഗം വിളിച്ച് കേന്ദ്ര ആരോഗ്യമന്ത്രാലയം സ്ഥിതിഗതികൾ വിലയിരുത്തി.

കേന്ദ്ര ആരോഗ്യ സെക്രട്ടറി വിളിച്ച യോഗത്തിൽ മഹാരാഷ്ട്ര, ഗുജറാത്ത്, ഹരിയാന, തമിഴ്‌നാട്, ഛത്തീസ്ഗഡ്, മദ്ധ്യപ്രദേശ്, പശ്ചിമ ബംഗാൾ, ഡൽഹി, ജമ്മുകാശ്‌മീർ, കർണാടക, പഞ്ചാബ്, ബിഹാർ എന്നീ സംസ്ഥാനങ്ങളിലെ അഡിഷണൽ ചീഫ്‌ സെക്രട്ടറിമാർ, പ്രിൻസിപ്പൽ സെക്രട്ടറിമാർ എന്നിവരും 46 ജില്ലകളിലെ മുൻസിപ്പൽ കമ്മിഷണർമാരും കളക്ടർമാരും പങ്കെടുത്തു. ഈ ജില്ലകളിൽ പ്രതിരോധം ശക്തമാക്കണമെന്ന് കേന്ദ്രം നിർദ്ദേശിക്കുകയുണ്ടായി. കൊറോണ വൈറസ് രോഗ വ്യാപനം രൂക്ഷമായിക്കൊണ്ടിരിക്കുന്ന സാഹചര്യത്തിൽ മഹാരാഷ്ട്ര സർക്കാർ നിയന്ത്രണങ്ങൾ ഏപ്രിൽ 15 വരെ നീട്ടിയിരിക്കുന്നു. സംസ്ഥാനത്ത് 35,726 പുതിയ കേസുകളും 166 മരണങ്ങളും റിപ്പോർട്ട് ചെയ്തിരിക്കുന്നു. ഇന്ന് അർദ്ധരാത്രി മുതൽ മഹാരാഷ്ട്രയിൽ രാത്രികാല കർഫ്യൂ നിലവിൽ വരും.