കേരളം ഒരു പ്രത്യേക രാജ്യമാണെന്ന് കരുതുന്ന സി.പി.എം, ഡോളർക്കടത്തിൽ സർക്കാർ കൂടുതൽ കുരുക്കിലേക്ക്; കെ.സുരേന്ദ്രൻ

സ്വർണ്ണക്കടത്ത്-ഡോളർ കടത്തു കേസിന്റെ അന്വേഷണം പുരോ​ഗമിക്കുമ്പോൾ സംസ്ഥാനത്തെ നാലുമന്ത്രിമാരും സ്പീക്കറും മുഖ്യമന്ത്രിയും കൂടുതൽ കുരിക്കിലേക്ക് പോവുകയാണെന്ന് ബി.ജെ.പി സംസ്ഥാന അദ്ധ്യക്ഷൻ കെ.സുരേന്ദ്രൻ. കുറ്റവാളികളായ പലർക്കും പ്രോട്ടോകോൾ ഓഫീസ് മുഖേന വിദേശ രാജ്യങ്ങളിൽ വിവിഐപി പരി​ഗണന കിട്ടിയെന്നും തൃശ്ശൂരിൽ നടന്ന സംസ്ഥാന സമിതിയിൽ നടത്തിയ അദ്ധ്യക്ഷപ്രസംഗത്തിൽ അദ്ദേഹം പറഞ്ഞു.

കുപ്രസിദ്ധരായ പല വിദേശ പൗരൻമാർക്കും പ്രോട്ടോകോൾ ഓഫീസർ സൗകര്യം ചെയ്തുകൊടുത്തു. സ്വർണ്ണക്കടത്തിലും ഡോളർക്കടത്തിലും പ്രതികളായവർക്കും പ്രോട്ടോകോൾ ഓഫീസ് വഴി പരി​ഗണന കിട്ടി. ഭരണഘടനയുടെ ഏറ്റവും പവിത്രമായ സ്പീക്കർ പദവി മലിനമാക്കിയ പി.ശ്രീരാമകൃഷ്ണൻ ഉടൻ രാജിവെക്കണം. നിയമസഭാ മന്ദിരത്തിന്റെ നിർമ്മാണവുമായി ബന്ധപ്പെട്ട് അദ്ദേഹം നടത്തിയ ധൂർത്തുകൾ ന്യായീകരണമില്ലാത്തതാണ്. സാർവ്വത്രികമായ അഴിമതിയാണ് കേരളത്തിൽ നടക്കുന്നത്.

Also Read: കൊവിഡിനെതിരെയുള്ള വാക്സിന്‍ ഉത്പാദനത്തിലും വിതരണത്തിലും ചൈനയെ കടത്തി വെട്ടി ഇന്ത്യന്‍ മുന്നേറ്റം

സ്വർണ്ണക്കടത്ത് പുറത്തുവന്നപ്പോൾ ജൂലായ് ആറിന് മുഖ്യമന്ത്രി പറഞ്ഞത് തന്റെ ഓഫീസിന് പങ്കില്ലെന്നും മടയിൽ കനമുള്ളവൻ പേടിച്ചാൽ മതിയെന്നുമാണ്. കേന്ദ്ര ഏജൻസികളുടെ അന്വേഷണത്തെ തുടക്കത്തിൽ സ്വാ​ഗതം ചെയ്ത മുഖ്യമന്ത്രി തന്റെ മനസാക്ഷി സൂക്ഷിപ്പുകാരനായ മുൻ പ്രിൻസിപ്പൽ സെക്രട്ടറി എം.ശിവശങ്കരൻ പിടിയിലാവുകയും അന്വേഷണത്തിന്റെ കുന്തമുന തന്നിലേക്കാണെന്ന് മനസിലാകുകയും ചെയ്തതോടെ അന്വേഷണ ഏജൻസികൾക്കെതിരെ തിരിഞ്ഞു. മുഖ്യമന്ത്രിയുടെ അഡീഷണൽ സെക്രട്ടറി സി.എം രവീന്ദ്രനെ എൻഫോഴ്സ്മെന്റ് ഡയറക്ടേഴ്സ് നോട്ടീസ് നൽകുകയും ഓഫീസിലെ മറ്റൊരു വിശ്വസ്തനായ ഉദ്യോ​ഗസ്ഥൻ ആരോപണവിധേയനാവുകയും ചെയ്തതോടെ
ഈ വലിയ തട്ടിപ്പിന്റെ സൂത്രധാരൻ മുഖ്യമന്ത്രിയാണെന്ന് ജനങ്ങൾക്ക് ബോധ്യമായി.

Also Read: എതിർക്കുന്നയാളെ പിടിച്ച് വച്ച് വസ്ത്രമഴിച്ച് പീഡിപ്പിക്കാനാവില്ല; പോക്സോ കേസ് പ്രതിയെ വെറുതേ വിട്ട് ബോംബെ ഹൈക്കോടതി

എന്നാൽ അധികാരത്തിൽ കടിച്ചുതൂങ്ങാനാണ് അദ്ദേഹം ശ്രമിക്കുന്നത്.
കിഫ്‌ബി പദ്ധതിയെക്കുറിച്ച് എന്തൊക്കെ വീരവാദങ്ങളാണ് കേരളം കേട്ടുകൊണ്ടിരുന്നത്. പദ്ധതിക്ക് പുറത്തു പണം കണ്ടെത്തി വികസന പ്രവർത്തനങ്ങൾ നടത്താനുള്ള ഉദ്യമമായാണ് അതിനെ പലരും കണ്ടത്. വികസന പദ്ധതികളെ എല്ലാവരും അനുകൂലിക്കുന്നത് സ്വാഭാവികമാണല്ലോ. എന്നാൽ അതിന്റെ മറവിൽ നടന്നത് ശുദ്ധ തട്ടിപ്പാണ് എന്നതല്ലേ ഇപ്പോൾ കംപ്ട്രോളർ ആൻഡ് ഓഡിറ്റർ ജനറൽ കണ്ടെത്തിയത്. വിദേശത്തുനിന്നുപോലും അതിനായി പണം കൊണ്ടുവന്നത് ഭരണഘടനാവിരുദ്ധമാണെന്നാണ് സിഎജിയുടെ കണ്ടെത്തൽ. കോടാനുകോടിയാണ് വിദേശത്തുനിന്നടക്കം കേരളം ഇതിനകം കടമെടുത്തത്, അതും നാട്ടിലെങ്ങുമില്ലാത്ത പലിശയ്ക്ക്. ഇക്കാര്യം ഇപ്പോൾ കോടതിയിലുമെത്തിയിരിക്കുന്നു.

അഴിമതിയെ എതിർത്തതിനാൽ ഭരണഘടനാ സ്ഥാപനമായ സിഎജിയെ തകർക്കാൻ ശ്രമിക്കുകയാണ് പിണറായി വിജയൻ സർക്കാർ. നിയമസഭയെ ദുരുപയോ​ഗം ചെയ്ത് സിഎജിക്കെതിരെ പ്രമേയം വരെ കൊണ്ടുവന്നിരിക്കുകയാണവർ. ഭരണഘടനയേയും ജനാധിപത്യത്തെയും കമ്മ്യൂണിസ്റ്റുകാർ എങ്ങനെയാണ് നോക്കികാണുന്നതെന്നതിന് ഇതിലും വലിയ തെളിവ് ആവശ്യമില്ലെന്ന് സുരേന്ദ്രൻ ചൂണ്ടിക്കാട്ടി. വികസനത്തിന് ബിജെപി അനുകൂലമാണ്. വികസനപദ്ധതികൾ കൂടിയേ തീരൂ. എന്നാൽ അത് ഭരണഘടനാ വിരുദ്ധമായി നടപ്പിലാക്കാൻ എങ്ങിനെ കേരളത്തിന് കഴിയും? കേരളം ഒരു പ്രത്യേക രാജ്യമാണ് എന്ന മട്ടിൽ നമ്മുടെ ചില മന്ത്രിമാരും സിപിഎമ്മും പറഞ്ഞാൽ അതിനെ നഖശിഖാന്തം എത്തിക്കുക മാത്രമല്ലേ മാർഗമുള്ളൂ. ഇവിടെ പ്രശ്നം, കിഫ്‌ബി ഇടപാടുകൾ നിയമവിരുദ്ധവും ഭരണഘടനാ വിരുദ്ധവുമാണ് എന്ന സിഎജി- യുടെ വിലയിരുത്തൽ യുക്തിപൂർണ്ണമാണ് എന്നതാണ്.

Also Read: മൃതദേഹം കത്തിക്കരിഞ്ഞ നിലയില്‍ കണ്ടെത്തിയ സംഭവത്തില്‍ പ്രതിയെ കുരുക്കിയത് ആ ചോദ്യം

കേരളത്തെ അക്ഷരാർഥത്തിൽ കടക്കെണിയിൽ അകപ്പെടുത്തുന്ന നീക്കങ്ങൾ ഈ സർക്കാർ ഇതിനകം ചെയ്തുകഴിഞ്ഞു എന്ന് കരുതേണ്ടിവരുന്നത് അതുകൊണ്ടാണ്. ഇനി ഒരിക്കലും തിരിച്ചുകയറാൻ കഴിയാത്ത സാമ്പത്തിക പ്രതിസന്ധിയിലേക്ക് ഈ ഇടതുപക്ഷ സർക്കാർ ഈ കൊച്ചു കേരളത്തെ എത്തിച്ചിരിക്കുകയാണ്.

ഒരു വർഷമായി തുടരുന്ന മഹായുദ്ധത്തിൽ പ്രധാനമന്ത്രി നരേന്ദ്രമോദിയുടെ നേതൃത്വത്തിൽ രാജ്യം കൊവിഡിനെ തോൽപ്പിച്ചപ്പോൾ നമ്മുടെ കേരളം കൊവിഡിന് ദയനീയമായി കീഴടങ്ങിയെന്ന് സുരേന്ദ്രൻ പറഞ്ഞു. ഏറെ കൊട്ടിഘോഷിച്ച പിണറായി സർക്കാരിന്റെ കൊവിഡ് പ്രതിരോധം എന്നത് വെറും പിആർ പ്രചരണം മാത്രമായിരുന്നെന്ന് ജനങ്ങൾക്ക് ബോധ്യമായി കഴിഞ്ഞു. ഇന്ന് രാജ്യത്തെ കൊവിഡ് കേസിന്റെ പകുതിയിലേറെ കേരളത്തിലാണ്. കേരളത്തിൽ കൊവിഡ് നിയന്ത്രണങ്ങളെല്ലാം പാളിയതാണ് കേസുകൾ വർദ്ധിക്കാൻ കാരണം. വാക്സിൻ എടുക്കുന്നവരുടെ എണ്ണത്തിൽ കേരളം അമാന്തം കാണിക്കുന്നു. ആരോ​ഗ്യവകുപ്പും സർക്കാരും വൻപരാജയമാണ്.