കാട്ടാന ആക്രമണം ; മലക്കപ്പാറയിൽ കടയും വീടും തകർത്തു

മലക്കപ്പാറയിൽ കാട്ടാന കൂട്ടം പലചരക്കു കട തകർത്തു. കഴിഞ്ഞ ദിവസം രാത്രി 12 മണിയോടെയായിരുന്നു ആക്രമണം. കൊച്ചിൻ റോഡിൽ 13 ജംക്​ഷനിലുള്ള ശ്രീനിവാസന്റെ കടയാണ് ആനക്കൂട്ടം ആക്രമിച്ചത്. കീഴ്‌പെരട്ട് മാരിയമ്മൻ കോവിലിന് സമീപം ശശിയുടെ വീടിന്റെ ജനൽ ആനകൾ തകർത്തു. സമീപത്ത് പ്രവർത്തിക്കുന്ന ഹോംസ്റ്റേ കെട്ടിടത്തിനും നാശമുണ്ടാക്കി.

കടയോട് ചേർന്ന മുറിയിൽ കിടന്നുറങ്ങുകയായിരുന്ന ശ്രീനിവാസനും കുടുംബവും ശബ്ദം കേട്ട് വീടിന്റെ പിറകു വശത്ത് കൂടെ ഇറങ്ങി ഓടി രക്ഷപെടുകയായിരുന്നു. 25000 രൂപയുടെ നഷ്ടം കണക്കാക്കുന്നതായി ശ്രീനിവാസൻ പറ‍ഞ്ഞു. പ്രദേശവാസികൾ ഒച്ചയിട്ടാണ് ആനകളെ തുരത്തിയത്. മലക്കപ്പാറ പൊലീസ് സംഭവസ്ഥലം സന്ദർശിച്ച് നടപടികൾ സ്വീകരിച്ചു.