കേന്ദ്ര സർക്കാരിനെതിരെ സമരം ചെയ്യുന്ന കർഷകർക്ക് ഐക്യദാർഢ്യം പ്രഖ്യാപിച്ച് ജീവനൊടുക്കിയ കർണാൽ സ്വദേശിയുടെ മരണത്തിൽ ദുരൂഹതയെന്ന് റിപ്പോർട്ട്. ഹരിയാനയിലെ കർണാൽ സ്വദേശിയായ സാന്റ് ബാബാ രാം സിംഗ് ആത്മഹത്യ ചെയ്തതാണെന്ന് നിലനിൽക്കേ അദ്ദേഹത്തിന്റെ സുഹൃത്താണ് മരണത്തിൽ ദുരൂഹതയുണ്ടെന്ന് ആരോപിച്ച് രംഗത്തെത്തിയത്.
ലൈസൻസുള്ള തോക്ക് ഉപയോഗിച്ച് രാംസിംഗ് സ്വയം വെടിയുതിർത്തതാണെന്നാണ് സമരക്കാർ പറഞ്ഞത്. എന്നാൽ, അദ്ദേഹം ആത്മഹത്യ ചെയ്യാനും മാത്രം വിഡ്ഡിയല്ലെന്നും ഏതൊരു പ്രശ്നത്തിനും പരിഹാരം കാണാൻ കഴിയുന്ന വ്യക്തിയാണെന്നും സുഹൃത്തായ ചണ്ഡിഗഡ് സ്വദേശി അമർജിത് കൗറാണ് ഒരു ചാനൽ പരിപാടിയിൽ വ്യക്തമാക്കിയത്.
തനിക്ക് രാം സിംഗുമായി വളരെക്കാലമായി ബന്ധമുണ്ടെന്ന് കൗർ പറഞ്ഞു. അദ്ദേഹത്തിനു ഒരിക്കലും ആത്മഹത്യ ചെയ്യാൻ കഴിയില്ല. ആത്മഹത്യാക്കുറിപ്പിലെ കൈയക്ഷരവും അദ്ദേഹത്തിന്റേതല്ല. ആത്മഹത്യ ചെയ്യുന്നത് ഒന്നിനും ഉത്തരമല്ലെന്നും ആരും അത് ചെയ്യാൻ പാടില്ലെന്നും പറയാറുള്ള അദ്ദേഹം സമരത്തിന്റെ പേരിൽ ആത്മഹത്യ ചെയ്യുമെന്ന് വിശ്വസിക്കാനാകില്ലെന്നും കൗർ പറയുന്നു.
രാം സിംഗിന്റെ പക്കൽ പിസ്റ്റൾ ഇല്ലായിരുന്നുവെന്നും കൗർ വ്യക്തമാക്കി. അനുയായികളും കാവൽക്കാരും അദ്ദേഹത്തെ ഒരിക്കലും തനിച്ചാക്കിയിട്ടില്ലെന്നും അവർ കൂട്ടിച്ചേർത്തു. ഇതോടെ രാംസിംഗിന്റെ മരണം ആത്മഹത്യ തന്നെയാണോയെന്ന സംശയവും നിലനിൽക്കുന്നു. കർഷക സമരത്തിന് കൂടുതൽ പ്രാധാന്യം കിട്ടാൻ അദ്ദേഹത്തെ ആരെങ്കിലും കൊലപ്പെടുത്തിയതാണോയെന്ന സംശയവും ട്വിറ്റർ അടക്കമുള്ള സോഷ്യൽ മീഡിയകളിൽ നിന്നും ഉയരുന്നുണ്ട്.
Post Your Comments