‘മൂന്ന് തവണ വിളിച്ചു, ഒഴിഞ്ഞു മാറിയെങ്കിലും സ്വപ്ന സമ്മതിച്ചില്ല’- സ്പീക്കറുടെ കുമ്പസാരം

സ്വർണക്കടത്ത് കേസുമായി ബന്ധപ്പെട്ട് സ്പീക്കർ ശ്രീരാമകൃഷ്ണനെതിരെ പ്രതിപക്ഷവും ബിജെപിയും ആരോപണം ഉന്നയിച്ച് രംഗത്തെത്തിയിരുന്നു. സ്വർണക്കടത്ത് കേസിലെ മുഖ്യപ്രതി സ്വപ്ന സുരേഷുമായി ബന്ധമുണ്ടെന്ന ആരോപണങ്ങൾക്ക് വിശദീകരണവുമായി സ്പീക്കർ. സ്വപ്നയുമായി മുൻപരിചയമോ അടുത്തബന്ധമോ ഇല്ലെന്ന് സ്പീക്കർ മാതൃഭൂമിക്ക് നൽകിയ അഭിമുഖത്തില് വ്യക്തമാക്കി.

യു എ ഇ കോൺസുലേറ്റിലെ ഒരു ഉദ്യോഗസ്ഥ എന്ന നിലയിൽ മാത്രമാണ് തനിക്ക് സ്വപ്നയെ പരിചയമെന്ന് സ്പീക്കർ പറയുന്നു. സ്വപ്നയുടെ പരിചയത്തിലുള്ള ഒരു കട ഉദ്ഘാടനം ചെയ്യാൻ നെടുമങ്ങാട്ട് പോയി എന്നതാണ് താൻ ചെയ്ത അബദ്ധമെന്ന് സ്പീക്കർ തുറന്നു സമ്മതിക്കുന്നു. സ്പീക്കറിന്റെ വാക്കുകൾ ഇങ്ങനെ:

‘ഒരു യാത്രകളിലും അവർ കൂടെ ഉണ്ടായിരുന്നില്ല. അവരുടെ നിർബന്ധത്തിന് വഴങ്ങി നെടുമങ്ങാട്ട് കാർബർ എന്നൊരു കട ഞാൻ ഉദ്ഘാടനം ചെയ്തു എന്നതാണ് ഞാൻ ചെയ്ത തെറ്റ്. സ്വപ്നയുമായുള്ള സൗഹൃദത്തിന്റെ പേരിലായിരുന്നു ആ യാത്ര. ആ കട ഉദ്ഘാടനം ചെയതിന്റെ പേരിലാണ് എനിക്കെതിരെ ആക്ഷേപങ്ങൾ ഉയരുന്നത്. മൂന്ന് തവണ ഒഴിഞ്ഞു മാറിയതാണ്. പിന്നീട് സ്വപ്നയുടെ നിർബന്ധത്തിന് വഴങ്ങിയാണ് പോയത്’.