ലക്‌നൗ : കേന്ദ്ര സർക്കാർ ആവിഷ്‌കരിച്ച കാർഷിക ബില്ലിനെ എതിർക്കുന്നവർക്കെതിരെ രൂക്ഷ വിമർശനവുമായി ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. ബില്ലിനെ എതിർക്കുന്നവർ കർഷക വിരുദ്ധരാണെന്ന് യോഗി ആദിത്യനാഥ് പറഞ്ഞു. ബി.ജെ.പി പ്രവർത്തകരുമായി സംസാരിക്കവെയാണ് അദ്ദേഹം ബില്ലിനെ എതിർക്കുന്നവർക്കെതിരെ രൂക്ഷമായ ഭാഷയിൽ വിമർശനം ഉന്നയിച്ചത്.
കർഷകരുടെ ലാഭം ഇരട്ടിയാക്കുമെന്ന് പ്രധാനമന്ത്രി നരേന്ദ്ര മോദി ഉറപ്പ് നൽകിയിരുന്നു. ഈ ഉദ്ദേശ്യത്തോടെയാണ് ബില്ല് രാജ്യസഭയിൽ കൊണ്ടുവന്നതും പാസ്സാക്കിയതും. ഇടനിലക്കാരെ ഇല്ലാതാക്കി വിളകൾ നല്ല വിലയ്ക്ക് വിൽക്കാൻ കർഷകർക്ക് സ്വാതന്ത്ര്യം നൽകുന്നതാണ് ബില്ല്. എന്നാൽ പ്രതിപക്ഷം ബില്ലിനെക്കുറിച്ച് ആളുകൾക്കിടയിൽ തെറ്റിദ്ധാരണ പരത്തുകയാണ്. ഇത്തരത്തിൽ കർഷകർക്ക് ഗുണമുണ്ടാകുന്ന കാര്യങ്ങളെ എതിർക്കുന്നവർ കർഷക വിരുദ്ധരാണെന്നും അദ്ദേഹം പറഞ്ഞു.
വളരെ വിഷമം നിറഞ്ഞ ഘട്ടത്തിൽ പോലും ജനങ്ങൾക്കൊപ്പം നിന്ന സർക്കാരാണ് രാജ്യം ഭരിയ്ക്കുന്നത്. കഴിഞ്ഞ ആറ് മാസത്തിനിടെ 12 ഇരട്ടിയിലധികം ഭക്ഷ്യധാന്യങ്ങളാണ് സർക്കാർ ജനങ്ങൾക്ക് വിതരണം ചെയ്തത്. അതിനാൽ രാജ്യത്ത് ആർക്കും പട്ടിണി നേരിടേണ്ട അവസ്ഥയുണ്ടായില്ലെന്നും അദ്ദേഹം ചൂണ്ടിക്കാട്ടി.
Post Your Comments