തമിഴ്‌നാടില്‍ ലോക്ക്ഡൗണ്‍ നീട്ടി ; ഞായറാഴ്ച സമ്പൂര്‍ണ ലോക്ക്ഡൗണ്‍ ; കൂടുതല്‍ നിബന്ധനകള്‍

ചെന്നൈ: സംസ്ഥാനത്ത് കോവിഡ് കേസുകള്‍ വര്‍ദ്ധിക്കുന്ന സാഹചര്യത്തില്‍ തമിഴ്‌നാട്ടില്‍ ലോക്ഡൗണ്‍ ഓഗസ്റ്റ് 31 വരെ നീട്ടി. അതുവരെ എല്ലാ ഞായറാഴ്ചകളിലും പൂര്‍ണ്ണമായ ലോക്ക്ഡൗണ്‍ ആയിരിക്കും. മറ്റ് സംസ്ഥാനങ്ങളില്‍ നിന്ന് തമിഴ്‌നാട്ടിലേക്ക് പ്രവേശിക്കുന്നതിനും ജില്ലാ അതിര്‍ത്തികള്‍ കടക്കുന്നതിനും ഇ പാസ് നിര്‍ബന്ധമാക്കി. ഓഗസ്റ്റ് 2,9,16,23, 30 തീയതികളില്‍ കടുത്ത നിയന്ത്രണങ്ങള്‍ ഏര്‍പ്പെടുമെന്ന് മുഖ്യമന്ത്രി കെ പളനിസ്വാമി പറഞ്ഞു.

സംസ്ഥാനത്ത് ഓഗസ്റ്റ് 31 വരെ ബസ് സര്‍വ്വീസും ടാക്‌സി സര്‍വ്വീസും ഉണ്ടാകില്ല. അവശ്യസാധങ്ങള്‍ വില്‍ക്കുന്ന കടകള്‍ക്ക് വൈകിട്ട് 7 വരെ തുറക്കാന്‍ അനുമതിയുണ്ട്. രാത്രി യാത്രാ നിയന്ത്രണം തുടരുമെന്നും ജിമ്മും യോഗാ കേന്ദ്രവും ഷോപ്പിങ്ങ് മാളുകളും തുറക്കില്ലെന്നും തമിഴ്‌നാട് സര്‍ക്കാര്‍ വ്യക്തമാക്കി. തമിഴ്നാടില്‍ സ്ഥിരീകരിച്ച 2,27,688 കേസുകളില്‍ 57,073 കേസുകളും നിലവില്‍ സജീവമാണ്.

* ലോക്ക്ഡൗണ്‍ സമയത്ത് അനുവദനീയമായതും അല്ലാത്തതും

പലചരക്ക് കടകള്‍ രാത്രി 7 വരെ തുറന്നിരിക്കും.

പൊതുഗതാഗതം, ട്രെയിനുകള്‍, മെട്രോ എന്നിവ ഓഗസ്റ്റ് 31 വരെ നിര്‍ത്തിവച്ചിരിക്കും

സ്വകാര്യ വ്യവസായങ്ങള്‍ക്ക് 75 ശതമാനം തൊഴിലാളികളുമായി പ്രവര്‍ത്തിക്കാന്‍ കഴിയും.

ചെന്നൈയിലെ ഭക്ഷണശാലകള്‍ക്ക് 50 ശതമാനം ശേഷിയുള്ള ഡൈന്‍-ഇന്‍ സേവനങ്ങള്‍ ആരംഭിക്കാന്‍ കഴിയും.

അവശ്യവസ്തുക്കളുടെ ഓണ്‍ലൈന്‍ വിതരണം അനുവദനീയമാണ്.

രാത്രി 9 വരെ ഭക്ഷ്യ വിതരണ സേവനങ്ങള്‍ അനുവദിക്കും.

സ്വാതന്ത്ര്യദിനാഘോഷങ്ങള്‍ സാമൂഹിക അകലം പാലിച്ച് മറ്റ് നടപടികളോടെ ആചരിക്കേണ്ടതാണ്.

സംസ്ഥാനത്തെ കണ്ടെയ്ന്‍മെന്റ് സോണുകള്‍ക്ക് ഇളവ് നല്‍കില്ല.

മതസഭകള്‍ക്ക് നിലവിലുള്ള വിലക്ക് തുടരും.

ഷോപ്പിംഗ് മാളുകളും തിയേറ്ററുകളും ബാറുകളും അടച്ചിരിക്കും.