ആദ്യ പോപ്പ് അപ്പ് ക്യാമറ സ്മാർട്ട് ഫോൺ ഇന്ത്യൻ വിപണിയിലെത്തിക്കാനൊരുങ്ങി മോട്ടോറോള

തങ്ങളുടെ ആദ്യ പോപ്പ് ആപ്പ് ക്യാമറ സ്മാർട്ട് ഫോൺ വണ്‍ ഫ്യൂഷന്‍ പ്ലസ് ഇന്ത്യൻ വിപണിയിലെത്തിക്കാനൊരുങ്ങി മോട്ടോറോള. ദിവസങ്ങള്‍ക്ക് മുമ്പ് ഈ ഫോൺ യൂറോപ്പിൽ പുറത്തിറിക്കിയിരുന്നു. 6.5 ഇഞ്ച് ഫുള്‍ എച്ച്ഡി പ്ലസ് ഡിസ്പ്ലേ, ക്വാല്‍കോം സ്നാപ്ഡ്രാഗണ്‍ 730 പ്രൊസസർ, 16 എംപി പോപ്പ് അപ്പ് മുൻ ക്യാമറ, 64 എംപി+ എട്ട് എംപി അള്‍ട്രാവൈഡ് + അഞ്ച് എംപി മാക്രോ+ രണ്ട് എംപി ഡെപ്ത് സെന്‍സര്‍ എന്നിവ ഉൾപ്പെടുന്ന പിൻ ക്വാഡ് ക്യാമറ, 5000 എംഎഎച്ച് ബാറ്ററി, 15 വാട്ട് അതിവേഗ ചാര്‍ജിങ്, ആറ് ജിബി റാം 128 ജിബി സ്റ്റോറേജ് (ഒരു ടിബി വരെയുള്ള മൈക്രോ എസ്ഡി കാര്‍ഡുകള്‍ ഫോണില്‍ ഉപയോഗിക്കാം) എന്നിവ പ്രധാന സവിശേഷതകൾ. മൂണ്‍ലൈറ്റ് വൈറ്റ്, ട്വിലൈറ്റ് ബ്ലൂ തുടങ്ങിയ നിറങ്ങളില്‍ വിപണിയിലെത്തുന്ന ഫോണിന് യൂറോപ്പില്‍ 25,400ന് തുല്യമായ തുകയാണ് വില.