കണ്ണൂർ : 78 തടവുകാരെ കണ്ണൂര്‍ സെന്‍ട്രല്‍ ജയിലില്‍നിന്ന് പരോളില്‍ വിട്ടയച്ചു. കൊവിഡ് 19 വൈറസ് ബാധ വ്യാപിക്കുന്ന സാഹചര്യത്തിൽ സുപ്രീംകോടതി നിര്‍ദേശപ്രകാരമാണ് നടപടി. ജയിലുകളിലെ തിരക്കു കുറയ്ക്കുന്നതിന്‍റെ ഭാഗമായി 60 ദി വസത്തെ പരോളാണ് ഇപ്പോള്‍ അനുവദിച്ചത്. കണ്ണൂര്‍ സെന്‍ട്രല്‍ ജയിലിലെ 300 തടവുകാര്‍ക്ക് പരോളോ ഇടക്കാല ജാമ്യമോ അനുവദിക്കുന്നതു പരിഗണിക്കാമെന്ന് സെന്‍ട്രല്‍ ജയില്‍ സൂപ്രണ്ട് ബാബുരാജ് സംസ്ഥാന സര്‍ക്കാരിന് നേരത്തെ റിപ്പോര്‍ട്ട് നല്‍കിയിരുന്നു.
ലീഗല്‍ സര്‍വീസ് അഥോറിറ്റി ചെയര്‍മാന്‍ അധ്യക്ഷനായ സമിതിയാണ് പരോള്‍ അനുവദിക്കുന്നത്. വരുംദിവസങ്ങളില്‍ ജാമ്യത്തിന് അര്‍ഹതയുള്ളവരെ സമിതി തെരഞ്ഞെടുക്കും. എഴു വര്‍ഷം വരെ ജയിൽശിക്ഷ അനുഭവിക്കുന്നവര്‍ക്കും വിചാരണ തടവുകാര്‍ക്കും പരോളോ ഇടക്കാല ജാമ്യമോ അനുവദിക്കാമെന്നാണ് സുപ്രീം കോടതി പുറപ്പെടുവിച്ച നിർദേശം. രാജ്യത്തെ 13,339 ജയിലുകളിലായി 4,66,084 തടവുകാരുണ്ടെന്നാണ് കണക്കുകകൾ.
സംസ്ഥാനത്ത് കഴിഞ്ഞ ദിവസം 39 പേർക്ക് കൂടി കൊവിഡ് സ്ഥിരീകരിച്ചു. ഇവരിൽ 34 പേർ കാസർകോടുകാരാണ്. കണ്ണൂർ-2 , തൃശൂർ-1, കോഴിക്കോട് -1, കൊല്ലം-1 എന്നിങ്ങനെയാണ് മറ്റ് കണക്കുകൾ. കാസർകോട് മാത്രം ഇതുവരെ 80 പേർക്കാണ് രോഗം സ്ഥിരീകരിച്ചത്. ഇതോടെ സംസ്ഥാനത്തെ കൊവിഡ് രോഗികളുടെ എണ്ണം 164 ആയി. അതേസമയം ഇന്ന് 112 പേരെ ആശുപത്രിയിലാക്കി. സ്ഥിതി ഗുരുതരമാണെന്നും എന്ത് സാഹചര്യവും നേരിടാന്‍ ഒരുങ്ങണമെന്നും പത്രസമ്മേളനത്തിൽ മുഖ്യമന്ത്രി അറിയിച്ചു.
പുതുതായി രോഗം സ്ഥിരീകരിച്ചവർ നിരവധിപേരുമായി ബന്ധപ്പെട്ടെന്നാണ് സൂചന.അതുകൊണ്ട് തന്നെ അവരുടെ പേര് പരസ്യമായി പറയേണ്ട സ്ഥിതിയാണുള്ളത്. കാസർകോട് ജില്ലയിൽ ഇനിയും നിയന്ത്രണം കടുപ്പിക്കേണ്ടി വരും. കഴിഞ്ഞ ദിവസം തൊടുപുഴയിൽ രോഗം സ്ഥിരീകരിച്ച പൊതുപ്രവർത്തകൻ കാസർഗോഡ് മുതൽ തിരുവനന്തപുരം വരേയും മൂന്നാർ മുതൽ ഷൊളായാർ വരേയും സ‍ഞ്ചരിച്ചിട്ടുണ്ട്.വളരെ ജാഗ്രത പാലിക്കേണ്ട സന്ദർഭത്തിൽ ഒരു പൊതുപ്രവർത്തകൻ ഇങ്ങനെയാണോ പെരുമാറേണ്ടതെന്നും മുഖ്യമന്ത്രി പറഞ്ഞു. കൊറോണ വൈറസ് ഏറെ അകലെയല്ല. അതിനെ നേരിടാൻ ആദ്യം സൂക്ഷിക്കേണ്ടത് നമ്മൾ തന്നെയാണെന്നും അദ്ദേഹം അറിയിച്ചു.
Post Your Comments