ഫുഡ് ഓൺ വീൽസ് ഇനി മുതൽ ഇ- ഓട്ടോയിൽ

കൊച്ചി: കളമശ്ശേരി നഗരസഭയിലെ കുടുംബശ്രീ യൂണിറ്റുകളുടെ ഫുഡ് ഓൺ വീൽസ് പ്രവർത്തകർക്ക് ഇ- ഓട്ടോ വിതരണം ചെയ്യുന്നു. ഇടപ്പള്ളി കേന്ദ്രീകരിച്ച് പ്രവർത്തിക്കുന്ന ലൈഫ് കെയർ സോളാർ എന്ന കമ്പനിയാണ് ഇ – ഓട്ടോയുടെ വിതരണക്കാർ. ഒൻപത് വണ്ടികളാണ് നൽകുന്നത്. കേന്ദ്ര-സംസ്ഥാന സർക്കാരുകൾ പ്രഖ്യാപിച്ച ഇലക്ട്രിക് വാഹന നയങ്ങൾക്ക് അനുസൃതമായി തികച്ചും പരിസ്ഥിതി സൗഹൃദമാണ് ഇ- ഓട്ടോകൾ. ഓടിക്കുന്നതിന് പ്രത്യേക ലൈസൻസ് ആവശ്യമില്ലാത്ത ഇവയുടെ പരിപാലനവും എളുപ്പമാണ്. ചാർജ് ചെയ്യാവുന്ന ബാറ്ററികളാണ് ഇതിലുള്ളത്. ഓട്ടോകളുടെ വിതരണം 30 ന് കളമശ്ശേരി നഗരസഭ ഹാളിൽ പ്രതിപക്ഷ നേതാവ് രമേഷ് ചെന്നിത്തല നിർവ്വഹിക്കും. തദ്ദേശ സ്വയംഭരണ വകുപ്പ് മന്ത്രി എ.സി.മൊയ്തീൻ മുഖ്യാതിഥിയാകും.