പ്രാതലിന് കഴിയ്ക്കാം പഞ്ഞി പോലത്തെ വെളുത്ത ഇടിയപ്പം

പഞ്ഞി പോലത്തെ നല്ല വെളുത്ത ഇടിയപ്പത്തിന് ആരാധകര്‍ ഏറെ ഉണ്ടെങ്കിലും തയാറാക്കി എടുക്കാനുള്ള ബുദ്ധിമുട്ടുകൊണ്ട് പലരും അത് ഒഴിവാക്കുകയാണ് പതിവ്. എളുപ്പത്തില്‍ കൈ നനയാതെ കുഴയ്ക്കാതെ ചൂടുവെള്ളം ഇല്ലാതെ എങ്ങനെ നല്ല സോഫ്റ്റ് ഇടിയപ്പം ഉണ്ടാക്കാമെന്ന് പരിചയപ്പെടാം.

ചേരുവകള്‍

ഇടിയപ്പം പൊടി – 1 കപ്പ്
വെള്ളം – 1½ കപ്പ്
ഉപ്പ് – ആവശ്യത്തിന്
വെളിച്ചെണ്ണ – 1 ടേബിള്‍ സ്പൂണ്‍

തയാറാക്കുന്ന വിധം

ചുവടു കട്ടിയുള്ള ഒരു പാനിലേക്ക് ഇടിയപ്പപ്പൊടി, വെള്ളം, ആവശ്യത്തിന് ഉപ്പ്, വെളിച്ചെണ്ണ എന്നിവ ചേര്‍ത്ത് നല്ലതുപോലെ ഇളക്കി യോജിപ്പിച്ചശേഷം തീ കത്തിച്ച് മീഡിയം ഫ്രെയിമില്‍ വച്ച് കൈവിടാതെ ഇളക്കിപൊടി വേവിച്ചെടുക്കുക. (വെന്ത പാകം മനസിലാക്കാനായി മാവ് തവികൊണ്ട് പൊക്കി നോക്കുമ്പോള്‍ ഒറ്റ കട്ടയായി വരുന്നുണ്ടെങ്കില്‍ പൊടി പാകത്തിന് വെന്തു കഴിഞ്ഞു)

ഇടിയപ്പത്തിന്റെ അച്ചില്‍ മാവ് നിറച്ച് , പിഴിഞ്ഞ് ആവിയില്‍ 10 മിനിറ്റോളം വേവിച്ചെടുക്കുക