ഉദ്യോഗാർത്ഥികളുടെ ശ്രദ്ധയ്ക്ക് : എല്‍.ഡി. ക്ലാര്‍ക്ക് വിജ്ഞാപനത്തിനു പി.എസ്.സിയുടെ അംഗീകാരം, ഉടൻ പ്രസിദ്ധീകരിക്കും

തിരുവനന്തപുരം : വിവിധ സർക്കാർ വകുപ്പുകളിലെ എല്‍.ഡി. ക്ലാര്‍ക്ക് നിയമനത്തിനായുള്ള പുതിയ വിജ്ഞാപനത്തിനു പി.എസ്.സി യോഗത്തിൽ അംഗീകാരം. നവംബറില്‍ വിജ്ഞാപനം പ്രസിദ്ധീകരിക്കും. എസ്.എസ്.എല്‍.സി.യാണു യോഗ്യത. 2019 ജനുവരി ഒന്ന് കണക്കാക്കിയാണു പ്രായം നിശ്ചയിക്കുക. പൊതുവിഭാഗം 36, ഒ.ബി.സി. 39, എസ്.സി./എസ്.ടി.ക്ക് 41 എന്നിങ്ങനെയാണ് ഉയർന്ന പ്രായ പരിധി. 2021 ഏപ്രില്‍ ആദ്യം റാങ്ക്പട്ടിക പ്രസിദ്ധീകരിക്കാനാണ് ലക്ഷ്യം. നിലവിലുള്ള റാങ്ക്പട്ടികയുടെ മൂന്നുവര്‍ഷ കാലാവധി 2021 ഏപ്രില്‍ ഒന്നിനാണ്  അവസാനിക്കുന്നത്.

Also read : മഹിള ശിക്ഷൺ കേന്ദ്രത്തിൽ വിവിധ തസ്തികകളിൽ നിയമനം

എല്‍.ഡി. ക്ലാര്‍ക്കിനൊപ്പം സ്റ്റാറ്റിസ്റ്റിക്സ്, ഇക്കണോമിക്സ് കോളേജ് ലക്ചറര്‍, കൊമേഴ്സ്യല്‍ പ്രാക്ടീസില്‍ ഹെഡ് ഓഫ് സെക്ഷന്‍, സയന്റിഫിക് അസിസ്റ്റന്റ്, ട്രെയിനിങ് ഓഫീസര്‍ എന്നിവ ഉൾപ്പെടുന്ന 64 തസ്തികകളുടെ വിജ്ഞാപനങ്ങളും അംഗീകരിച്ചു. കൂടാതെ ഇ-വേക്കന്‍സിയായി റിപ്പോര്‍ട്ട് ചെയ്യുന്നതിനൊപ്പം തപാല്‍ മുഖേനയും ഇ-മെയിലായും കിട്ടുന്ന ഒഴിവുകളും 2020 മാര്‍ച്ച് 31 വരെ സ്വീകരിക്കാനും പി.എസ്.സി. യോഗത്തിൽ തീരുമാനമായി.

2011-ല്‍ സര്‍ക്കാര്‍ എല്‍.ഡി.സി.യുടെ യോഗ്യത എസ്.എസ്.എല്‍.സി.യില്‍നിന്ന് പ്ലസ്ടുവാക്കി ഉയര്‍ത്തി ഉത്തരവിറക്കിയെങ്കിലും സ്പെഷ്യല്‍റൂള്‍ അംഗീകരിക്കാത്തതിനാൽ 2013-ല്‍ പ്രത്യേക ഉത്തരവിറക്കിയാണ് എസ്.എസ്.എല്‍.സി. യോഗ്യത നിലനിര്‍ത്തികൊണ്ടുള്ള എല്‍.ഡി.സി. വിജ്ഞാപനങ്ങള്‍ പി.എസ്.സി. പ്രസിദ്ധീകരിക്കുന്നത്. സ്പെഷ്യല്‍റൂള്‍ ഭേദഗതിചെയ്യുന്നതുവരെ എസ്.എസ്.എല്‍.സി. യോഗ്യതയാക്കി നിയമനം നടത്താന്‍ പി.എസ്.സി.ക്ക് 2013 ജൂലായ് 23ലെ ഉത്തരവ് അനുമതി നൽകുന്നു. പുതിയ വിജ്ഞാപനവും ഇതിന്റെ അടിസ്ഥാനത്തിലാണ് പി.എസ്.സി. തയ്യാറാക്കിയത്.