വാഹനാപകടത്തില്‍ നിരവധി ജീവനുകളാണ് ഇന്ന് പൊലിയുന്നത്. ദിവസവും റോഡപകടങ്ങളെ കുറിച്ചുള്ള വാര്‍ത്തകളുണ്ട്. നിയമങ്ങള്‍ കര്‍ശനമാക്കിയിട്ടും ഇതിന് യാതൊരു കുറവുമില്ലെന്നുള്ളതാണ് പുറത്തുവരുന്ന വാര്‍ത്തകള്‍ സൂചിപ്പിക്കുന്നത്. അതേസമയം കേരളത്തിലെ ആദ്യത്തെ വാഹനാപകട മരണത്തിന് 105 വയസ്.’ കേരള പൊലീസിന്റെ ഔദ്യോഗിക പേജില്‍ പങ്കുവച്ച കുറിപ്പിലാണ് ഈ അപകടത്തിന്റെ വിവരം തുറന്നെഴുതിയിരിക്കുന്നത്. അന്ന് വാഹനാപകടത്തില്‍ മരിച്ചത് കേരള കാളിദാസന്‍ കേരളവര്‍മ വലിയ കോയിത്തമ്പുരാന്‍ ആണെന്നും പൊലീസിന്റെ കുറിപ്പില്‍ പറയുന്നുണ്ട്.
പോസ്റ്റിന്റെ പൂര്‍ണ്ണരൂപം
കേരളത്തിലെ ആദ്യ വാഹനാപകട മരണത്തിന് 105 വർഷം. 1914 സെപ്‌തംബർ 20ന്‌ കായംകുളത്തിനടുത്തായിരുന്നു അപകടം. അപകടത്തിൽ മരണപ്പെട്ടത് കേരള കാളിദാസൻ കേരളവർമ വലിയ കോയിത്തമ്പുരാൻ. സെപ്റ്റംബർ 22ന്‌ അദ്ദേഹം മരിച്ചു. വൈക്കം ക്ഷേത്രദർശനം കഴിഞ്ഞ്‌ തിരുവനന്തപുരം കൊട്ടാരത്തിലേക്ക്‌ മടങ്ങവേ കായംകുളം കുറ്റിത്തെരുവ്‌ ജങ്‌ഷനിലാണ്‌ കാർ മറിഞ്ഞത്‌. മരുമകൻ കേരള പാണിനി എ ആർ രാജരാജവർമയും കൂടെയുണ്ടായിരുന്നു.
ചികിത്സയിലിരിക്കെ എ ആർ രാജരാജവർമയുടെ മാവേലിക്കരയിലെ കൊട്ടാരത്തിലായിരുന്നു അന്ത്യം. നായ കുറുകെ ചാടിയതോടെ ഡ്രൈവർ കാർ വെട്ടിച്ചതാണ്‌ അപകടത്തിനിടയാക്കിയത്‌. ‘‘അടുത്ത വീട്ടിലെത്തിച്ച്‌ വെള്ളം നൽകി വിശ്രമിച്ചശേഷമാണ്‌ മാവേലിക്കര കൊട്ടാരത്തിലെത്തിച്ചത്‌’’
എ ആർ രാജരാജവർമയുടെ ഡയറികുറിപ്പിൽ അപകടത്തെക്കുറിച്ച്‌ ഇങ്ങനെ പറയുന്നു. ‘ആണ്ടുതോറുമുള്ള വൈക്കം ക്ഷേത്രദർശനത്തിന്‌ കൊല്ലത്തെത്തിയപ്പോഴേ മടക്കയാത്രയ്‌ക്ക്‌ കാറുമായി വരണമെന്ന്‌ തമ്പുരാൻ പറഞ്ഞു. കുറ്റിത്തെരുവുപാലം കഴിഞ്ഞതോടെ നായ കുറുകെ ചാടി. അമ്മാവൻ ഇരുന്ന ഭാഗത്തേക്ക്‌ കാർ മറിഞ്ഞു. നെഞ്ചിന്റെ വലതുഭാഗം കാറിലോ നിലത്തോ ഇടിച്ചിട്ടുണ്ടാവാം. പുറമെ പരിക്കില്ലായിരുന്നു. പരിചാരകൻ തിരുമുൽപാടിന്റെ കാലൊടിഞ്ഞു. എനിക്കോ ഡ്രൈവർക്കോ പരിക്കേറ്റില്ല. ഉടനെ കൊട്ടാരത്തിലെത്തി വലിയത്താൻ ഡോക്ടറെ കാണിച്ചു. രണ്ടാംദിവസമാണ്‌ ശ്വാസോഛ്വാസത്തിനു വേഗത കൂടിയതും എന്റെ കൈകളിലേക്കു ചാരി അന്ത്യശ്വാസം വലിച്ചതും.’
എ ആറിന്റെ മക്കൾ ഭാഗീരഥി അമ്മ തമ്പുരാനും എം രാഘവവർമ രാജായും ചേർന്നെഴുതിയ ‘എ ആർ രാജരാജവർമ’ പുസ്‌തകത്തിലാണ്‌ ഡയറിക്കുറിപ്പുള്ളത്‌.
കടപ്പാട്: ടി ആർ അനിൽകുമാർ
https://www.facebook.com/keralapolice/photos/a.135262556569242/2368895143205961/?type=3&__xts__%5B0%5D=68.ARDSwz8VPqlfiMTAQbf09yW-6XurcY9saRXF3-ywSt0xDh8yDWYtYXFHJbJ-yfXReuugzu64VjkJ-BIZGO4ArNtdWjgQchTdyAs1Dv70rUA5KvMfhMm5S3SqIiwHzz-Opm8pcKy_alCvwe66LgIO02bKnevFaEVdkKmDu8uDiygiFfsewWF2vmvpuXXCQGF06kCVDj-Z4Hzg_SDKG4CnSY_rzqqBr8iGe8yyQExplnJ4fmITXgv9oxiRHKo2b7WnAvc5dA8pIVRaUiw9oTu2MrjB7Zkkxv-Hdh8H1_ut2D5rZ1CGiFxykug6jVWGahkQgUhhI3dNtPTBMNqqaJQkYQpMgQ&__tn__=-R
Post Your Comments