വൈദ്യുതി ലൈൻ പൊട്ടിവീണ് രണ്ടുപേർ മരിച്ച സംഭവം ; കുടുംബങ്ങൾക്ക് ധനസഹായം

തിരുവനന്തപുരം : തിരുവനന്തപുരം പേട്ടയിൽ വൈദ്യുതി ലൈൻ പൊട്ടിവീണ് രണ്ടുപേർ മരിച്ച സംഭവത്തിൽ മരിച്ചവരുടെ കുടുംബങ്ങൾക്ക് കെഎസ്ഇബി 10 ലക്ഷം രൂപ ധനസഹായം നൽകും. അടിയന്തിര സഹായമായി 2 ലക്ഷം രൂപ ആദ്യം നൽകും.പേട്ട സ്വദേശികളായ രാധാകൃഷ്ണന്‍, പ്രസന്നകുമാരി എന്നിവരാണ് മരിച്ചത്.

പത്ര വിതരണത്തിന് പോയ കുട്ടിയാണ് രണ്ടുപേർ വെള്ളത്തിൽ മരിച്ചുകിടക്കുന്നത് കണ്ടത്. മൃതദേഹങ്ങൾ കണ്ട് കുട്ടി ഓടുന്നത് സമീപത്തുള്ള സിസിടിവി ദൃശ്യങ്ങളിൽ കാണാം. ഈ കുട്ടിയാണ് ആളുകളെ വിവരമറിയിച്ചത്.

സംഭവത്തിന് പിന്നില്‍ കെഎസ്ഇബിയുടെ അനാസ്ഥയാണെന്ന് ആരോപിച്ച് നാട്ടുകാര്‍ പ്രതിഷേധിച്ചു. അല്‍പസമയം പ്രതിഷേധം നടത്തിയതിന് ശേഷം മാത്രമാണ് മൃതദേഹങ്ങള്‍ നീക്കാന്‍ നാട്ടുകാര്‍ അനുവദിച്ചത്. ഇന്നലെ രാത്രി ശക്തമായ മഴ പെയ്തതാണ് പ്രേദശത്ത് വെളളക്കെട്ട് ഉണ്ടാവാന്‍ കാരണമായത്.