മലപ്പുറം : നിയന്ത്രണംവിട്ട ക്രെയിന്‍ മത്സ്യമാര്‍ക്കറ്റിലേക്ക് ഇടിച്ചുകയറി നാലുപേര്‍ക്ക് പരിക്ക്. കോട്ടയ്ക്കല്‍ പുത്തൂരിലെ മത്സ്യമാര്‍ക്കറ്റില്‍ ഞായറാഴ്ച രാത്രി ഒന്‍പതരയോടെയാണ് അപകടം.
പെരിന്തല്‍മണ്ണയില്‍നിന്ന് കോഴിക്കോട് ഭാഗത്തേക്ക് പോവുകയായിരുന്ന ക്രെയിന്‍ പുത്തൂര്‍ ഇറക്കത്തില്‍ നിയന്ത്രണംവിട്ട് റോഡരികിലെ സംരക്ഷണഭിത്തി തകര്‍ത്ത് തൊട്ടടുത്ത പറമ്പിലൂടെ മത്സ്യമാര്‍ക്കറ്റിലേക്ക് ഇടിച്ചുകയറുകയായിരുന്നു. മീന്‍ വാങ്ങാന്‍നിന്നിരുന്ന രണ്ടുപേര്‍ക്കും വാഹനത്തില്‍ ഉണ്ടായിരുന്ന രണ്ടുപേര്‍ക്കും ആണ് പരിക്കേറ്റത്. ചിലര്‍ ഓടിരക്ഷപ്പെട്ടു. ഞായറാഴ്ച ആയതിനാലും തിരക്ക് കുറവായതിനാലും വലിയ അപകടം ഒഴിവായി.
പരിക്കേറ്റവരെ കോട്ടയ്ക്കലിലെ സ്വകാര്യ ആശുപത്രിയില്‍ പ്രവേശിപ്പിച്ചു. ആരുടെയും പരിക്ക് ഗുരുതരമല്ല.
ക്രെയിന്‍ തട്ടി വൈദ്യുതിലൈന്‍ തകര്‍ന്നു. പുത്തൂരിലും പരിസരപ്രദേശങ്ങളിലും വൈദ്യുതി തടസ്സപ്പെട്ടു. കോട്ടയ്ക്കല്‍ പോലീസ് സ്ഥലത്തെത്തി പരിശോധന നടത്തി.
Post Your Comments