കൊല്ലം കൊല്ലം പ്രസ് ക്ലബ്ബിന്റെ സുവര്‍ണജൂബിലി ആഘോഷം ഉദ്ഘാടനം ചെയ്യാന്‍ ഉപരാഷ്ട്രപതി എം.വെങ്കയ്യ നായിഡു ശനിയാഴ്ച കൊല്ലത്തെത്തും. വ്യോമസേനയുടെ പ്രത്യേക ഹെലികോപ്റ്ററില്‍ ശനിയാഴ്ച 2.15-നാണ് ഉപരാഷ്ട്രപതി കൊല്ലം ആശ്രാമം ഹെലിപാഡില്‍ എത്തുക.
അവിടെ മന്ത്രി ജെ.മേഴ്‌സിക്കുട്ടിയമ്മ, മേയര്‍ വി.രാജേന്ദ്രബാബു, എന്‍.കെ.പ്രേമചന്ദ്രന്‍ എം.പി., എം.മുകേഷ് എം.എല്‍.എ., കളക്ടര്‍ ഡോ. എസ്.കാര്‍ത്തികേയന്‍, സിറ്റി പോലീസ് കമ്മിഷണര്‍ എന്നിവര്‍ ചേര്‍ന്ന് അദ്ദേഹത്തെ സ്വീകരിക്കും. തുടര്‍ന്ന് ഉപരാഷ്ട്രപതി കാര്‍മാര്‍ഗം യൂനുസ് കണ്‍വെന്‍ഷന്‍ സെന്ററില്‍ എത്തും.
2.30-ന് അദ്ദേഹം പ്രസ് ക്ലബ്ബ് സുവര്‍ണജൂബിലി ആഘോഷങ്ങളുടെ ഉദ്ഘാടനവും സുവര്‍ണജൂബിലി ആഘോഷ ശിലാഫലകത്തിന്റെയും സുവര്‍ണജൂബിലി സ്മാരക പ്രത്യേക തപാല്‍ സ്റ്റാന്പിന്റെയും പ്രകാശനവും നിര്‍വഹിക്കും. ഗവര്‍ണര്‍ പി.സദാശിവം അധ്യക്ഷത വഹിക്കും.
ഉദ്ഘാടനച്ചടങ്ങിനെത്തുന്നവര്‍ ഉച്ചയ്ക്ക് രണ്ടിനുതന്നെ കണ്‍വെന്‍ഷന്‍ സെന്ററില്‍ എത്തി സീറ്റുകളിലിരിക്കണമെന്ന് പ്രസ് ക്ലബ്ബ് ഭാരവാഹികള്‍ അറിയിച്ചു. ചടങ്ങിന് എത്തുന്നവരുടെ വാഹനങ്ങള്‍ ആശ്രാമം ഗസ്റ്റ് ഹൗസ് പരിസരം, ആശ്രാമം മൈതാനത്തെ പ്രദര്‍ശന നഗരിക്കു പുറകുവശം എന്നിവിടങ്ങളിലാണ് പാര്‍ക്ക് ചെയ്യേണ്ടത്.
Post Your Comments