കണ്ണൂര്‍: ഉഡാന്‍ വിമാന സര്‍വീസുകള്‍ നാളെ മുതല്‍

മട്ടന്നൂര്‍: കണ്ണൂര്‍ വിമാനത്താവളത്തില്‍ നിന്ന് ഉഡാന്‍ വിമാന സര്‍വീസുകള്‍ നാളെ മുതല്‍. ഇന്‍ഡിഗോ എയര്‍ലൈന്‍സിന്റെ ഉഡാന്‍ സര്‍വീസുകള്‍ ഹൈദരാബാദ്, ചെന്നൈ, ഹുബ്ബള്ളി, ബെംഗളൂരു, ഗോവ എന്നിവിടങ്ങളിലേക്ക് പ്രതിദിന സര്‍വീസുകള്‍ നടത്തും. ഉഡാന്‍ സര്‍വീസിനുള്ള വ്യവസ്ഥകളില്‍ കേന്ദ്ര സര്‍ക്കാര്‍ ഇളവുകള്‍ അനുവദിച്ചതിനെത്തുടര്‍ന്നാണ് കിയാല്‍ സര്‍വീസുകള്‍ക്ക് സന്നദ്ധരായത്. 74 പേര്‍ക്കിരിക്കാവുന്ന എ.ടി.7 വിമാനങ്ങളാണ് ഇന്‍ഡിഗോ സര്‍വീസുകള്‍ക്ക് ഉപയോഗിക്കുക.

രാവിലെ 9.15ന് കണ്ണൂരില്‍നിന്ന് പുറപ്പെട്ട് 11 മണിക്ക് ഹൈദരാബാദിലെത്തും. തിരിച്ച് 11.35ന് പുറപ്പെട്ട് 1.25ന് കണ്ണൂരിലെത്തും. ഉച്ചയ്ക്ക് 1.45ന് ചെന്നൈയിലേക്ക് പുറപ്പെടുന്ന വിമാനം 3.20ന് ചെന്നൈയിലെത്തും. ചെന്നൈയില്‍നിന്ന് വൈകീട്ട് നാലിന് പുറപ്പെട്ട് 5.30ന് കണ്ണൂരിലെത്തും. വൈകീട്ട് 5.50നാണ് ഹുബ്ബള്ളിയിലേക്കുള്ള സര്‍വീസ്. 7.05ന് എത്തും. തിരിച്ച് 7.25ന് ഹുബ്ബള്ളിയില്‍ നിന്ന് പുറപ്പെട്ട് 8.45ന് കണ്ണൂരിലെത്തും. ബെംഗളൂരുവില്‍നിന്നുള്ള വിമാനം രാത്രി 8ന് പുറപ്പെട്ട് 9.05ന് കണ്ണൂരിലെത്തും. കണ്ണൂരില്‍ നിന്ന് തിരിച്ച് 9.25ന് പുറപ്പെട്ട് 10.30ന് ബെംഗളൂരുവില്‍ എത്തും. ഗോവയിലേക്ക് രാത്രി 10.05ന് പുറപ്പെട്ട് 11.35ന് എത്തിച്ചേരും. തിരിച്ച് 11.55ന് പുറപ്പെട്ട് 1.20ന് കണ്ണൂരിലെത്തുന്ന വിധത്തിലാണ് ക്രമീകരിച്ചിരിക്കുന്നത്.