എംപാനൽ കണ്ടക്ടർ തസ്തിക; പിരിച്ചുവിട്ടതിന് പിന്നാലെ പിഎസ്‌സി വഴി കെഎസ്ആർടിസിയിൽ തിരിച്ചെത്തി രണ്ട് പേർ

മലപ്പുറം: എംപാനൽ കണ്ടക്ടർ തസ്തികയിൽനിന്ന് ജോലി നഷ്ടപ്പെട്ടതിന് പിന്നാലെ പിഎസ്‌സി വഴി കെഎസ്ആർടിസിയിൽ കണ്ടക്ടറായി തിരിച്ചെത്തി 2 പേർ. തിരുവനന്തപുരം സ്വദേശി ശ്രീലതയും കോട്ടയം സ്വദേശി സന്തോഷുമാണ് തിരിച്ചെത്തിയത്. 2013ലെ പിഎസ്‌സി പട്ടികയിൽ ഉൾപ്പെട്ടവരാണ് ഇരുവരും. ശ്രീലത പാലോട് ഡിപ്പോയിൽ എംപാനൽ കണ്ടക്ടർ ആയിരുന്നു. ഇന്നലെ രാവിലെ പത്തോടെ മലപ്പുറം ഡിപ്പോയിലെത്തി രേഖകളിൽ ഒപ്പുവച്ചു. ഉച്ചയ്ക്ക് രണ്ടിനുള്ള കോഴിക്കോട്– പാലക്കാട് ബസിലാണ് ജോലി തുടങ്ങിയത്. പൊൻകുന്നം ഡിപ്പോയിൽ എംപാനൽ കണ്ടക്ടറായിരുന്നു സന്തോഷ്. കാഞ്ഞങ്ങാട് – ചന്ദ്രഗിരി – കാസർകോട് ബസിലായിരുന്നു ഇന്നലത്തെ ജോലി.