സന്നിധാനത്ത് ഭക്തജനത്തിരക്ക് ; കെഎസ്ആർടിസി കൂടുതൽ സർവീസുകൾ നടത്തുന്നു

പത്തനംതിട്ട : സന്നിധാനത്ത് ഭക്തജനത്തിരക്ക്. തീർത്ഥാടകർക്ക് സുഗമമായി എത്തി ചേരുന്നതിനു നിലയ്ക്കലിൽ നിന്ന് പമ്പയിലേക്ക് കെഎസ്ആർടിസി കൂടുതൽ സർവീസുകൾ നടത്തുന്നു. 865 സർവീസുകൾ ഇന്നലെ കെഎസ്ആർടിസി നടത്തിയിരുന്നു. ഇന്ന് എഴുനൂറിലധികം സർവീസുകൾ നടത്താനാണ് തീരുമാനം.

സാവധാനം ആണെങ്കിലും ശബരിമല ഭക്തരുടെ എണ്ണത്തിന്റെ കാര്യത്തിൽ പഴയ പ്രതാപത്തിലേക്ക് മടങ്ങിയെത്തുകയാണ്.ഇക്കഴിഞ്ഞ വ്യാഴം, വെള്ളി ദിവസങ്ങളിൽ അര ലക്ഷത്തിൽ അധികം തീർത്ഥാടകരാണ് പമ്പ വഴി മല ചവിട്ടിയത്. തിങ്കളാഴ്ചയാണ് ഈ സീസണിൽ ഏറ്റവും അധികം തിരക്ക് അനുഭവപ്പെട്ട ദിവസം. 56,000 പേരാണ് അന്ന് പമ്പ വഴി സന്നിധാനത്ത് എത്തിയത്. അന്യസംസ്ഥാനങ്ങളിൽ നിന്നുള്ള തീർത്ഥാടകരാണ് വരുന്നവരിൽ ഏറിയ പങ്കും.

പ്രതിഷേധങ്ങളും മറ്റും ഒഴിഞ്ഞു നിൽക്കുന്നതും നിയന്ത്രണങ്ങളിൽ ഇളവ് വരുത്തിയതും ആണ് ഭക്തരുടെ എണ്ണം കൂടാൻ കാരണം. വരും ദിവസങ്ങളിൽ തീർത്ഥാടകരുടെ എണ്ണം ഇനിയും കൂടുമെന്നാണ് പ്രതീക്ഷിക്കുന്നത്.