പാലക്കാട്ട് പന്തെടുക്കാനുളള പ്രയത്നത്തിനിടെ കുട്ടികള്‍ കുളത്തില്‍ വീണ് മരിച്ചു

പാലക്കാട്:  കൂട്ടുകാരുമായുളള ഫുട്ബോള്‍ കളിക്കിടെ കുളത്തില്‍ വീണ പന്ത് എടുക്കാന്‍ ശ്രമിക്കവെ പാലക്കാട്ട് സ്വദേശികളായ രണ്ട് വിദ്യാര്‍ത്ഥികള്‍ക്ക് ദാരുണാന്ത്യം. ശ്രീഹരി (15), ജംഷിദ് (15) എന്നിവരാണ് മരിച്ചത്. പാലക്കാട്ടുളള ഭാരത് മാത കോളേജിലെ 9 -ാം ക്ലാസ് വിദ്യാര്‍ത്ഥികളാണ് ഇരുവരും. കൂട്ടുകാരന്‍റെ വീടിന് സമീപത്ത് കുളത്തിന് സമീപമായുളള വെളി പ്രദേശത്ത് കളിക്കുന്ന സമയത്താണ് അപകടം ഉണ്ടായത്.

പന്ത് തെറിച്ച് കുളത്തിലേക്ക് പോയതിനെത്തുടര്‍ന്ന് ഇരുവരും ചേര്‍ന്ന് കുളത്തിലിറങ്ങി പന്ത് തിരികെ എടുക്കാന്‍ ശ്രമിക്കവെയാണ് കുളത്തിലേക്ക് വീണത്. കുളത്തിലേക്ക് കുട്ടികള്‍ വീണതോടെ കൂടെയുണ്ടായിരുന്ന  കൂട്ടുകാരന്‍  ഭയപ്പെട്ട് നിലവിളിച്ചു.  നിലവിളികേട്ട് നാട്ടുകാര്‍ ഒാടിക്കൂടുകയും ഫയര്‍ഫോഴ്സിനെ വിവരമറിയിക്കുകയും ചെയ്തു. ഒരു മണിക്കൂറത്തെ തിരച്ചിലിന് ശേഷമാണ് കുട്ടികളെ കണ്ടെത്താന്‍ കഴിഞ്ഞതെന്നാണ് റിപ്പോര്‍ട്ടുകള്‍. പോസ്റ്റുമോര്‍ട്ടത്തിന് ശേഷം മൃതദേഹം വീട്ടുകാര്‍ക്ക്   വിട്ട്  നല്‍കി.