തിരുവനന്തപുരം: പ്രളയക്കെടുതിയെ അതിജീവിച്ച കേരളത്തെ പ്രശംസിച്ച ഇന്ത്യന്‍ ക്രിക്കറ്റ് ടീം നായകന്‍ വിരാട് കോഹ്‌ലിക്ക് നന്ദിയറിച്ച്‌ ഗവര്‍ണര്‍ പി.സദാശിവം. കോഹ്‌ലിയുടെ വാക്കുകള്‍ വിലപ്പെട്ടതാണെന്നും നന്ദിയറിയിക്കുന്നുവെന്നുമാണ് ഗവര്‍ണര്‍ ട്വിറ്ററില്‍ കുറിച്ചത്.
പ്രളയത്തില്‍ നിന്ന് കേരളം തിരിച്ചു വരുന്നതിനേക്കുറിച്ചും സംസ്ഥാനത്തെത്തിയപ്പോള്‍ ലഭിച്ച സ്വീകരണത്തേക്കുറിച്ചും ടീം അംഗങ്ങള്‍ താമസിക്കുന്ന ലീല ഹോട്ടലിലെ ബുക്കില്‍ കോഹ്ലി കുറിച്ചിരുന്നു. കോഹ്‌ലിയുടെ കുറിപ്പ് നവമാധ്യമങ്ങളില്‍ വൈറലാവുകയും ചെയ്തിരുന്നു.
“ഇവിടെ വരുന്നതും ഇവിടെ നിന്നു ലഭിക്കുന്ന ഉണര്‍വും വളരെയധികം ഞാന്‍ ഇഷ്ടപ്പെടുന്നു. കേരളത്തിന്‍റെ സൗന്ദര്യം ഓരോരുത്തരും ആസ്വദിക്കേണ്ടതാണ്. ദൈവത്തിന്‍റെ സ്വന്തം നാടായ കേരളത്തിലേക്ക് ഞാന്‍ എല്ലാവരെയും ക്ഷണിക്കുന്നു. തിരിച്ചു വരവിന്‍റെ പാതയിലാണ് കേരളം. പൂര്‍ണസുരക്ഷിതമാണ് കേരളം സന്ദര്‍ശിക്കാന്‍. ഞാന്‍ ഇവിടെയുള്ളിടത്തോളം സമയം എന്നെ സന്തോഷിപ്പിക്കുന്ന ഈ സ്ഥലത്തിന് ഞാന്‍ നന്ദി അറിയിക്കുന്നു’- ഇതായിരുന്നു കോഹ്‌ലിയുടെ വാക്കുകള്‍.
Post Your Comments