തിരുവനന്തപുരം : വാഹനാപകടത്തിൽ പരിക്കേറ്റു തിരുവനന്തപുരം അനന്തപുരി ആശുപത്രിയില്‍ ചികിത്സയിലുള്ള വയലിനിസ്റ്റ് ബാലഭാസ്കറിന്റെ ഭാര്യ ലക്ഷ്മിയെ ആരോഗ്യനില മെച്ചപ്പെട്ടത്തിന്റെ അടിസ്ഥാനത്തിൽ ചൊവ്വാഴ്ച ഡിസ്ചാര്‍ജ് ചെയ്തേക്കും.ആരോഗ്യം സാധാരണ നിലയിലെത്തുന്നതായി ആശുപത്രി മേധാവി ഡോ. മാര്‍ത്താണ്ഡപിള്ള അറിയിച്ചു.
വെന്റിലേറ്ററിലായിരുന്ന ലക്ഷ്മിയെ കഴി‌ഞ്ഞ എട്ടിന് ഐ.സി.യുവിലേക്ക് മാറ്റി. ശേഷമാണ് ഭര്‍ത്താവിന്റെയും മകളുടെയും വേര്‍പാട് അറിയിച്ചത്. ഈ ആഘാതത്തില്‍നിന്ന് ലക്ഷ്മി ഇതുവരെയും മോചിതയായിട്ടില്ല. അതിനാലാണ് വാര്‍ഡിലേക്ക് മാറ്റാത്തത്. പരിക്കുകള്‍ ഭേദപ്പെട്ട് തുടങ്ങിയിട്ടുണ്ട്. കൈമുട്ടുകള്‍ക്കും കാലിനും നടത്തിയ ശസ്ത്രക്രിയകള്‍ വിജയമായിരുന്നു.
ബാലഭാസ്കറിന്റെ സുഹൃത്തിന്റെ പാലക്കാട്ടെ ആയുര്‍വേദ ആശുപത്രിയിലേക്കാകും അനന്തപുരി ആശുപത്രിയില്‍നിന്ന് ലക്ഷ്മിയെ കൊണ്ട് പോവുക. ഇവിടെയായിരിക്കും തുടര്‍ചികിത്സ. ദീര്‍ഘനാളത്തെ തുടര്‍ചികിത്സയും കൗണ്‍സലിങ്ങും വേണ്ടിവരുമെന്നാണ് വിവരം.
Post Your Comments