ടാങ്കര്‍ ലോറി കാറുമായി കൂട്ടിയിടിച്ചുണ്ടായ അപകടം; കുട്ടികള്‍ ഉള്‍പ്പെടെ മൂന്ന് മരണം

കണ്ണൂര്‍: ടാങ്കര്‍ ലോറി കാറുമായി കൂട്ടിയിടിച്ച് കുട്ടികള്‍ ഉള്‍പ്പെടെ മൂന്ന് പേര്‍ മരിച്ചു. കണ്ണൂര്‍ പയ്യന്നൂര്‍ എടാട്ടാണ് ടാങ്കര്‍ ലോറി കാറുമായി കൂട്ടിയിടിച്ച് അപകടമുണ്ടായത്. പുലര്‍ച്ചെ നാലരയ്ക്കായിരുന്നു അപകടം. തൃശൂര്‍ കുറുക്കഞ്ചേരി സ്വദേശികളാണ് അപകടത്തില്‍പ്പെട്ടത്. ബിന്ദു ലാല്‍ (55) , സഹോദരിയുടെ മക്കളായ തരുണ്‍ (16), ഐശ്വര്യ(10) എന്നിവരാണ് മരിച്ചത്. മൂന്നു പേരും സംഭവസ്ഥലത്തു വച്ചു തന്നെ മരിച്ചു.

അപകടത്തില്‍ പത്മാവതി, നിയ, അനിത, വിജിത എന്നിവര്‍ക്കാണ് പരുക്കേല്‍ക്കുകയും ചെയ്തു. പരുക്കേറ്റവരുടെ നില ഗുരുതരമാണ്. ഇവരെ പരിയാരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഇടിയുടെ ആഘാതത്തില്‍ കാര്‍ പൂര്‍ണമായും തകര്‍ന്നു. തൃശൂരില്‍ നിന്നും മൂകാംബിക ക്ഷേത്ര ദര്‍ശനത്തിനു പോകുകയായിരുന്നു കാറിലുണ്ടായിരുന്ന കുടുംബം. എട്ടു പേരാണ് കാറിലുണ്ടായിരുന്നത്. ഇരു വാഹനങ്ങളും നേര്‍ക്കു നേര്‍ കൂട്ടിയിടിക്കുകയായിരുന്നു.