ചേർത്തല: നിര്‍ത്തിയിട്ട ലോറിക്ക് പിന്നിൽ മറ്റൊരു ലോറി ഇടിച്ച് രണ്ടു പേർക്ക് ദാരുണാന്ത്യം. തിങ്കളാഴ്ച പുലര്‍ച്ചെ അഞ്ചരയോടെ മാരാരിക്കുളം ദേശിയ പാതയില്‍ ചേര്‍ത്തല എസ്.എന്‍ കോളേജിന് സമീപമുണ്ടായ അപകടത്തിൽ കോഴിക്കോട് വടകര ചെമ്പാല വലിയ പുറത്ത് ജിജി (34), കണ്ണൂര്‍ പയ്യന്നൂര്‍ പുതുമന തെക്ക് മനോജ് (46)എന്നിവരാണ് മരിച്ചത്.
യാത്രയ്ക്കിടയില്‍ ജിജിയുടെ ലോറിയുടെ ടയറുകള്‍ തകരാറിലായി. ശേഷം ലോറി നിര്‍ത്തിയിട്ട് ടയര്‍ മാറുന്നതിനടയില്‍ മനോജ് ഓടിച്ചിരുന്ന ലോറി പിന്നിലിടിക്കുകയായിരുന്നു. അപകടം നടക്കുമ്പോള്‍ ജിജി ലോറിയുടെ അടിയില്‍ ടയര്‍ മാറ്റുകയായിരുന്നു. ഗുരുതരമായി പരിക്കേറ്റ ജിജിയെ ആലപ്പുഴ ജനറല്‍ ആസ്പത്രിയില്‍ എത്തിക്കും മുമ്പ് മരിച്ചിരുന്നു. ഇടിയുടെ ആഘാതത്തില്‍ ക്യാബിനുളളില്‍ കുടുങ്ങിയ മനോജിന്റെ മൃതദേഹം ലോറി പൊളിച്ചാണ് പുറത്തെടുത്തത്.
മനോജിനൊപ്പം ഉണ്ടായിരുന്ന കോഴിക്കോട് സ്വദേശി സുരേന്ദ്രന്‍ അപകടത്തില്‍ നിസ്സാര പരിക്കുകളോടെ രക്ഷപ്പെട്ടു. ജിജിയുടെ ലോറി ഓടിച്ചിരുന്ന ഡ്രൈവര്‍ അപകടത്തെ തുടര്‍ന്ന് ഭയന്ന് രക്ഷപ്പെട്ടിരുന്നു ഇയാളെ പിന്നീട് മാരാരിക്കുളം പോലീസ് കണ്ടെത്തി ആലപ്പുഴ ജനറല്‍ ആസ്പത്രിയില്‍ എത്തിച്ചു. രണ്ടു ലോറികളും തിരുവനന്തപുരത്തേക്ക് പോവുകയായിരുന്നു. ജിജിയുടെ ലോറിയില്‍ ചെങ്കല്ലും മനോജിന്റെ ലോറിയില്‍ ഇരുമ്പ് പൈപ്പുകളുമായിരുന്നു ഉണ്ടായിരുന്നത്. മാരാരിക്കുളം പോലീസ് കേസെടുത്തു
Post Your Comments