മാരകായുധങ്ങളുമായി അഞ്ചം​ഗസംഘം ബസിനകത്ത്, കണ്ടക്ടർമാർക്ക് ക്രൂര മർദ്ദനമേറ്റു

കൊട്ടിയം: സ്വകാര്യ ബസിനുള്ളിൽ മാരകായുധങ്ങളുമായി എത്തിയ അഞ്ചം​ഗ സംഘം ഭീകരാന്തരീക്ഷം സൃഷ്ട്ടിച്ചു. യാത്രക്കാരെ ഭീഷണിപ്പെടുത്തിയശേഷം കണ്ടക്ടർമാരെ മർദിക്കുകയും ചെയ്തു. ശനിയാഴ്ച ഉച്ചയ്ക്ക് രണ്ടേകാലോടെ കൊല്ലം-കണ്ണനല്ലൂർ റോഡിൽ ഡീസൻറുമുക്കിലായിരുന്നു സംഭവം നടന്നത്. കൊല്ലത്തുനിന്ന്‌ എഴുകോൺ വഴി കുണ്ടറയിലേക്ക് സർവീസ് നടത്തുന്ന ത്വയ്ബ ബസിലെ കണ്ടക്ടർമാരാണ് മർദ്ദനത്തിനിരയായത്.

സംഭവസമയത്ത് കണ്ണനല്ലൂർ ഭാഗത്തേക്ക് പോകുകയായിരുന്ന ബസിൽ പുന്തലത്താഴം മംഗലത്തുനട ബസ് സ്റ്റോപ്പിൽനിന്ന്‌ കയറിയ അഞ്ചംഗസംഘം കണ്ടക്ടർമാരായ നൗഫൽ, ഷിബു എന്നിവരെയാണ് ആക്രമിച്ചത്. കണ്ടക്ടർമാരെ ആക്രമിക്കുന്നതു കണ്ട് പ്രതികരിച്ച യാത്രക്കാരെ സംഘം ആയുധങ്ങൾ കാട്ടി ഭീഷണിപ്പെടുത്തി. ബസ് ഡീസൻറുമുക്കിലെത്തിയപ്പോൾ ബസിൽനിന്നിറങ്ങിയ അക്രമികൾ ബൈക്കിൽ കയറി രക്ഷപ്പെട്ടു. ആക്രമണത്തിനിരയായ കണ്ടക്ടർമാരെ ജില്ലാ ആശുപത്രിയിൽ പ്രവേശിപ്പിച്ചു. സംഭവത്തെക്കുറിച്ച് കൊട്ടിയം പോലീസ് അന്വേഷണം ആരംഭിച്ചിട്ടുണ്ട്.