അബുദാബി•അബുദാബി അന്തരാഷ്ട്ര വിമാനത്താവളം സെപ്റ്റംബര്‍ 27 ന് ഒരു ഒഴിപ്പിക്കലിന് സാക്ഷ്യം വഹിക്കും. പേടിക്കേണ്ട..! ഒരു മോക്ക് ഡ്രില്‍ മാത്രമാണിത്. ടെര്‍മിനല്‍ ഒന്നിന്റെ പുറപ്പെടല്‍ ഏരിയയാണ് വ്യാഴാഴ്ച ഒഴിപ്പിക്കുന്നത്.
രാവിലെ 9 മുതല്‍ 10 വരെ ഒരു മണിക്കൂറാകും മോക്ക് ഡ്രില്‍ നടക്കുക. ഈ സമയം വിമാനത്താവളത്തിന്റെ പ്രവര്‍ത്തനം തടസമൊന്നുമില്ലാതെ സാധാരണഗതിയില്‍ നടക്കും.
വിമാനത്താവളത്തിലെ അടിയന്തിര പ്രതികരണ ഏജൻസികളുടെ തയ്യാറെടുപ്പ് വിലയിരുത്താനും വിമാനത്താവളത്തിന്റെ അടിയന്തിര പ്രതികരണ ശേഷിയും നടപ്പാക്കൽ തന്ത്രങ്ങളും പരിശോധിക്കാനുമാണ് മോക്ക് ഡ്രില്‍ നടത്തുന്നതെന്ന് എയർപോർട്ട് ഓപ്പറേറ്റർ പ്രസ്താവനയിൽ പറഞ്ഞു.
യു.എ.ഇ സിവിൽ ഡിഫൻസ് പുറത്തിറക്കിയ അടിയന്തിര നടപടികളുടെ പ്ലാനുകൾ, അബുദാബി തൊഴിൽ സുരക്ഷ, ആരോഗ്യ കേന്ദ്രം എന്നിവയുടെ മാനദണ്ഡങ്ങളും ശുപാർശകളും അനുസരിച്ചാണ് പരിശീലനം.
Post Your Comments