നാവില്‍ രുചിയൂറും പനീര്‍ ബട്ടര്‍ മസാല ട്രൈ ചെയ്യാം

ആരോഗ്യത്തിനും ചര്‍മത്തിനും പറ്റുന്ന നല്ലൊരു ഭക്ഷണമാണ് പനീര്‍. നമുക്ക് എല്ലാവര്‍ക്കും പനീറിന്റെ വിവിധ വിഭവങ്ങള്‍ ഒരുപാട് ഇഷ്ടവുമാണ്. എന്നാല്‍ പലര്‍ക്കും ഇത് വീട്ടില്‍ തയാറാക്കാന്‍ അറിയില്ല എന്നതാണ് സത്യാവസ്ഥ. എളുപ്പത്തില്‍ പനീര്‍ ബട്ടര്‍ മസാല എങ്ങനെ ഉണ്ടാക്കാമെന്നു നോക്കൂ.

ചേരുവകള്‍

വെണ്ണ – 50 ഗ്രാം

സോയ പനീര്‍ – 200 ഗ്രാം

തക്കാളി നന്നായി പഴുത്തു ചുവപ്പ് നിറമായത് – 1/2 കിലോ

സവാള – 3

കശുവണ്ടി – 10- 12 എണ്ണം

ഏലക്കാപ്പൊടി – 1 ടീ സ്പൂണ്‍

ഗരം മസാല – 1 ടീ സ്പൂണ്‍

കാശ്മീരി മുളക്‌പൊടി- 1 സ്പൂണ്‍

കസൂരി മേഥി – 2 ടേബിള്‍ സ്പൂണ്‍

ജീരകപ്പൊടി – 1/4 സ്പൂണ്‍

മല്ലിപ്പൊടി – 1 സ്പൂണ്‍

ലോ ഫാറ്റ് ഫ്രഷ് ക്രീം – 1/2 കപ്പ്

പഞ്ചസ്സാര – 1 സ്പൂണ്‍

ഉപ്പ്

തയാറാക്കുന്ന വിധം

തക്കാളിയും സവാളയും കഷ്ണങ്ങളാക്കുക. ചൂടായ പാനില്‍ 2 സ്പൂണ്‍ എണ്ണ ഒഴിച്ച് ചൂടാകുമ്പോള്‍ തക്കാളിയും സവാളയും കശുവണ്ടിയും ചേര്‍ത്ത് വഴറ്റുക. തക്കാളിയും സവാളയും പാകമാകുമ്പോള്‍ ( ഇതില്‍ ധാരാളം വെള്ളം ഉണ്ടാകും) തീ കെടുത്തി ഈ കൂട്ട് മിക്‌സിയില്‍ നന്നായി അരച്ചെടുക്കുക

പാനില്‍ വെണ്ണ ഇട്ടു ചൂടാക്കുക. വെണ്ണയിലേക്ക് അരച്ച കൂട്ട് ചേര്‍ത്ത് ഇളക്കുക. ആവശ്യത്തിനു ഉപ്പും മുളകുപൊടിയും ചേര്‍ത്ത് ഇളക്കി , ഒരു അടപ്പ് കൊണ്ട് മൂടി 6-7 മിനിട്ട് ചെറു തീയില്‍ വേവിക്കുക. ഇനി അടപ്പ് തുറന്നു ഏലക്കാപ്പൊടി , ഗരം മസാല , ജീരകപ്പൊടി , മല്ലിപ്പൊടി എന്നിവ ചേര്‍ത്ത് ഇളക്കുക

കസൂരി മേഥി 2 മിനിട്ട് ഒരു പാത്രത്തില്‍ ഇട്ടു ചൂടാക്കി , രണ്ടു കൈ കൊണ്ടും തിരുമ്മി പൊടിച്ചു , അതിലെ വലിയ കരടുകള്‍ മാറ്റി , പൊടി മാത്രം തക്കാളി കൂട്ടില്‍ ചേര്‍ക്കുക. ഉപ്പ് പാകം നോക്കി ചേര്‍ക്കുക. തുടര്‍ന്ന് പഞ്ചസാരയും ഇടുക. ഒടുവില്‍ പനീറും ഫ്രഷ് ക്രീമും കൂടി ചേര്‍ത്തിളക്കി തീ കെടുത്തുക.