തളിപ്പറമ്പ് : പഠനത്തിനെത്തിയ വിദ്യാര്‍ത്ഥിനികളെ പീഡിപ്പിച്ചുവെന്ന കേസില്‍ ഉസ്താദ് മാണിയൂര്‍ ചെക്കിക്കുളം ‘സാജിദാ’സില്‍ പി.പി.ഹര്‍ഷാദിനെ(33) പൊലീസ് അറസ്റ്റുചെയ്തു. വിവാഹിതനും മൂന്നു കുട്ടികളുടെ പിതാവുമാണ് ഹര്‍ഷാദ്. പതിമൂന്ന് വയസ്സ് പ്രായമുള്ള നാലു വിദ്യാര്‍ത്ഥിനികളാണ് മദ്രസയില്‍ പീഡനത്തിനിരയായത്. ഇയാളുടെ പേരില്‍ പൊലീസ് നാല് കേസുകളെടുത്തു. വിദ്യാര്‍ത്ഥിനികളില്‍നിന്ന് ചൈല്‍ഡ്ലൈന്‍ അധികൃതര്‍ക്ക് ലഭിച്ച പരാതിയെത്തുടര്‍ന്നാണ് സംഭവം പുറത്തറിഞ്ഞത്.
സ്‌കൂളില്‍വെച്ചുള്ള സംഭാഷണത്തില്‍ പെണ്‍കുട്ടികള്‍ ഇക്കാര്യം സഹപാഠികളോട് പങ്കുവെക്കുകയായിരുന്നു.ജൂണ്‍, ജൂലായ് മാസങ്ങളില്‍ ഇവര്‍ ഹര്‍ഷാദിന്റെ പീഡനത്തിനിരയായി. ചൈല്‍ഡ് ലൈന്‍ അധികൃതരുടെ പരാതിയിലാണ് കേസ്. വിദ്യാര്‍ത്ഥിനികളില്‍നിന്നു പൊലീസ് ബുധനാഴ്ച മൊഴിയെടുത്തിരുന്നു. തുടര്‍ന്ന് പ്രതിയെ അറസ്റ്റുചെയ്തു. പോക്സോ നിയമ പ്രകാരമാണ് അറസ്റ്റ്. വൈകുന്നേരങ്ങളില്‍ ഏതാനും കുട്ടികള്‍ സ്‌കൂള്‍ വിട്ട് നേരെ മദ്രസയിലേക്ക് വരാറുണ്ട്.
നേരത്തെ എത്തുന്ന കുട്ടികള്‍ ക്ലാസ് മുറിയില്‍ ഇരിക്കുമ്പോള്‍ ആണ് സംഭവം നടന്നത്.തനിച്ച്‌ മദ്രസയില്‍ നേരത്തേയെത്തുന്ന വിദ്യാര്‍ത്ഥിനികളുടെ ശരീരത്തില്‍ അദ്ധ്യാപകന്‍ തൊട്ട് അപമാനിച്ചുവെന്നാണ് കേസ്. ഇവര്‍ പഠിക്കുന്ന സ്‌കൂളിലെ പ്രധാനാധ്യാപികയുടെ സാന്നിധ്യത്തില്‍ കുട്ടികളുടെ മൊഴിയെടുത്ത ചൈല്‍ഡ് ലൈന്‍ അധികൃതര്‍, തളിപ്പറമ്പ് പൊലീസില്‍ പരാതി നല്‍കുകയായിരുന്നു. തുടര്‍ന്നാണ് ഹര്‍ഷാദിനെ കേസെടുത്ത് അറസ്റ്റ് ചെയ്തത്.
Post Your Comments