ആലപ്പുഴ: ദമ്പതികള്‍ക്കു നേരെ മദ്യപസംഘത്തിന്റെ അഴിഞ്ഞാട്ടം. കാറില്‍ സഞ്ചരിച്ചിരുന്ന ദമ്പതികളെയാണ് മദ്യപസംഘം ആക്രമിച്ചത്. എറണാകുളം കുണ്ടന്നൂര്‍ സ്വദേശികളായ റോഷന്‍, ഭാര്യ ഡോണ എന്നിവര്‍ക്കാണ് ആലപ്പുഴ പൂച്ചാക്കലില്‍ ഞായറാഴ്ച വൈകിട്ട് മര്‍ദനമേറ്റത്. ആക്രമണത്തില്‍ കൈയ്ക്ക് ഒടിവ് സംഭവിച്ച ഡോണയെ കൊച്ചിയിലെ സ്വകാര്യ ആശുപത്രിയില്‍ പ്രവേശിപ്പിച്ചു.
പൂച്ചാക്കലില്‍ ഒരു വിവാഹത്തില്‍ പങ്കെടുത്തു കാറില്‍ തിരിച്ചുവരവെ മൂന്നു ചെറുപ്പക്കാര്‍ ഉള്‍പ്പെട്ട സംഘം ഇരുചക്രവാഹനത്തില്‍ റോഷന്‍ ഓടിച്ചിരുന്ന കാറിനു സമീപമെത്തി അസഭ്യം പറഞ്ഞു. ഇതിനുശേഷം ഇവര്‍ കാറിനു മുന്നില്‍ അപകടകരമായ രീതിയില്‍ വാഹനമോടിച്ചു. ഇടയ്ക്ക് യുവാക്കളുടെ വാഹനം ബ്രേക്ക് ചെയ്തപ്പോള്‍ റോഷന്റെ കാറും ബ്രേക്ക് ചെയ്തു. എന്നാല്‍ കാര്‍ ഇരുചക്രവാഹനത്തില്‍ ഇടിച്ചെന്ന് ആരോപിച്ച് മൂന്നംഗ സംഘം വാഹനം നിര്‍ത്തി റോഷനെ മര്‍ദിച്ചു. റോഷനെ മര്‍ദിക്കുന്നതു തടയാന്‍ ശ്രമിച്ച ഡോണയുടെ കൈ അക്രമിസംഘം പിടിച്ചുതിരിക്കുകയായിരുന്നു.
Post Your Comments