കൊച്ചി: മലയാളി യുവതാരം അഫ്ദല്‍ മുത്ത് കേരള ബ്ലാസ്റ്റേഴ്സുമായി കരാര്‍ ഒപ്പിട്ടു. നേരത്തെ കേരള ബ്ലാസ്റ്റേഴ്സിന്റെ റിസേര്‍വ് ടീമുമായി കേരള പ്രീമിയര്‍ ലീഗിന് വേണ്ടി മാത്രം കരാര്‍ ഒപ്പിട്ടിരുന്നു. കെ.പി.എല്ലില്‍ നടത്തിയ മികച്ച പ്രകടനമാണ് അഫ്ദാലിന് സീനിയർ ടീമിലേക്ക് കരാര്‍ നല്‍കാന്‍ ടീം മാനേജ്മെന്റിനെ പ്രേരിപ്പിച്ചത്. കെ.പി.എല്ലില്‍ ആറു ഗോളുകളാണ് ഈ യുവതാരം ബ്ലാസ്റ്റേഴ്സിനായി നേടിയത്.
കേരളം ചാമ്പ്യന്മാരായ സന്തോഷ് ട്രോഫി ടൂർണമെന്റിലും അഫ്ദലിന്റെ നിർണായക സാന്നിധ്യം ഉണ്ടായിരുന്നു. സെമിയില്‍ മിസോറാമിനെതിരെ നേടിയ നിര്‍ണായക ഗോള്‍ ഉള്‍പ്പെടെ ഗംഭീര പ്രകടനമാണ് അഫ്ദാല്‍ നടത്തിയിരുന്നത്.
മലപ്പുറം പാണ്ടിക്കാട് സ്വദേശിയായ ഇരുപത്തിയൊന്നുകാരൻ അഫ്ദല്‍, കാലിക്കറ്റ് യൂണിവേഴ്സിറ്റിയെ ആള്‍ ഇന്ത്യ ഇന്റര്‍ യൂണിവേഴ്സിറ്റി ചാമ്പ്യന്മാരാക്കുന്നതിലും പ്രധാനപങ്കു വഹിച്ചിട്ടുണ്ട്. ആള്‍ ഇന്ത്യന്‍ ഇന്റര്‍ യൂണിവേഴ്സിറ്റി ചാമ്പ്യൻഷിപ്പിൽ ടൂര്‍ണമെന്റിലെ മികച്ച താരമായി അഫ്ദലിനെയാണ് തിരഞ്ഞെടുത്തത്. രണ്ട് ഹാട്രിക്കാണ് അഫ്ദല്‍ ചാമ്പ്യൻഷിപ്പിൽ കാലിക്കറ്റിനായി നേടിയത്.
Post Your Comments